کراچی میں بیرون ملک سے آنے والے مسافروں کو لوٹنے والا پولیس وردیوں میں ملبوس ’وائٹ کرولا گینگ‘ سرگرم ہو گیا ہے۔
سندھ پولیس کے مطابق سعودی عرب سے عمرہ کر کے واپس آنے والے میاں بیوی کو پولیس وردیوں میں ملبوس وائٹ کرولا گینگ نے کراچی کے علاقے لیاقت آباد میں لوٹ لیا، ملزمان میاں بیوی سے ملکی و غیر ملکی کرنسی چھین کر فرار ہو گئے۔
متاثرہ شہری نے واقعہ کا مقدمہ کراچی کے علاقے لیاقت آباد کے سپر مارکیٹ تھانے میں درج کرا لیا ہے، مقدمے کی ایف آئی آر میں شہری نے مؤقف اختیار کیا ہے کہ گھر کے باہر جیسے ہی پہنچے وائٹ کرولا کار برابر میں آکر رکی جس میں پولیس وردی میں ملبوس 3 مسلح افراد سوار تھے۔
شہری کے مطابق ملزمان نے ان کے پاسپورٹ اور شناختی کارڈ چیک کیے اور تلاشی کے بہانے ان کی اہلیہ کے ہاتھ سے پرس چھین کر گاڑی میں سوار ہو کر فرار ہو گئے۔
’اہلیہ کے پرس میں 2200 سعودی ریال، 5 آسٹریلین ڈالر، 10 درہم اور 5 ہزار پاکستانی روپے تھے۔‘
سندھ پولیس کے مطابق ملزمان نے ایئرپورٹ سے شہریوں کا پیچھا تھا، جائے وقوعہ کے اطراف لگے سی سی ٹی وی کیمروں کی فوٹیج بھی حاصل کی جا رہی ہے اور واقعہ کا مقدمہ درج کرکے تحقیقات شروع کردی گئی ہیں۔
