پاکستان نے اسرائیل کی جانب سے مسجد الاقصیٰ میں نمازیوں کو روکنے کے لیے آہنی رکاوٹیں کھڑی کرنے کے اقدام کی شدید الفاظ میں مذمت کرتے ہوئے عالمی برادری سے فوری مداخلت کا مطالبہ کیا ہے۔
دفتر خارجہ کی جانب سے جاری ایک بیان میں کہا گیا ہے کہ اسرائیل کی جانب سے نمازیوں کو روکنے کے لیے یروشلم میں بالعموم اور مسجد اقصیٰ کے آس پاس خصوصاً 3 دروازوں پر آہنی رکاوٹیں کھڑی کرنا قابل مذمت اقدام ہے جس کی پاکستان بھرپور مذمت کرتا ہے۔
مزید پڑھیں
بیان میں کہا گیا ہے کہ تاریخی اور قانونی حقائق میں مزید تبدیلیاں متعارف کرانے کی غرض سے اور مسجد اقصیٰ میں اسرائیل کی سیاسی مداخلت بین الاقوامی قوانین کی صریحاً خلاف ورزی ہے۔
بیان میں کہا گیا ہے کہ عبادت گاہوں پر قابض طاقت کے حملے اور شہریوں کی ان تک رسائی کی آزادی کو سلب کرنا اور یروشلم انڈومنٹس انتظامیہ کے اختیارات کو بڑھانا، اردن کی وزارت اوقاف سے وابستہ مسجد اقصیٰ کے امور پر مسلسل حملہ ہے۔
پاکستان کی وزارت خارجہ نے اسرائیل کی جانب سےمسجد اقصیٰ کے تقدس کی بے حرمتی کرنے پر بین الاقوامی قوانین اور ان سے متعلق قراردادوں کی سنگین خلاف ورزیوں کو روکنے کے لیے فوری بین الاقوامی مداخلت کا مطالبہ بھی کیا ہے۔
