یوم پاکستان کے موقع پر ایک خصوصی ملی نغمہ ’پوچھے جو نام کوئی، تم پاکستان بتانا‘ جاری کیا گیا ہے جسے ملک کے نامور گلوکاروں نے مل کر گایا ہے۔
مزید پڑھیں
تمام محب وطن پاکستانیوں کے جذبات کی عکاسی کرتے اس ملی نغمے کو صنم ماروی، نتاشہ بیگ، رئیسہ رئیسانی، بلال علی، زیک آفریدی اور واسق ملک نے مل کر گایا۔ اس ملی نغمے کے شاعر خواجہ دانش ہیں۔
23 مارچ 1940ء کو قرارداد پاکستان منظور ہوئی اور مسلمانوں کے لیے الگ ریاست کا خواب دیکھا گیا تھا۔ پاکستان کو بنانے میں بے شمار قیمتی جانوں کی قربانی دی گئی اور یوم پاکستان ہمارے انہی اپنوں کو یاد کرنے کا ایک انداز ہے۔
یوم پاکستان پر ہر پاکستانی کے دل میں حب الوطنی کا جذبہ دوبارہ سے جنم لیتا ہے اور ملک کو ہر بری نظر سے بچانے کی دعا ہر لب پہ پائی جاتی ہے۔
یوم پاکستان کے موقع پر ملک کے کونے کونے میں 1940ء سے شروع ہونے والے قربانیوں اور انتھک محنت کے سفر کو یاد کیا جاتا ہے ۔ یوم پاکستان کے اس نغمے کو بھی اسی مناسبت سے تیار کیا گیا ہے اور اسے ملک بھر میں خوب پذیرائی حاصل ہورہی ہے۔
