سنی اتحاد کونسل کے چیئرمین صاحبزادہ حامد رضا نے شیر افضل مروت کے حالیہ بیان پر کہا ہے کہ پی ٹی آئی کے دوست اپنے معاملات گھر میں ہی حل کریں تو بہتر رہے گا۔
ایکس پر اپنے ایک پیغام میں انہوں نے شیر افضل مروت کو مشورہ دیا کہ وہ’ ہدایات لے کر پھوٹ مت ڈلوائیں‘۔
یاد رہے کہ جمعرات کو شیر افضل مروت نے تحریک انصاف کے غلط فیصلوں کی تحقیقات کا مطالبہ کرتے ہوئے کہا تھا کہ ’بلے باز کیوں آیا، کیسے آیا اس کا پتا لگانا ضروری ہے‘۔
مزید پڑھیں
اس پر پی ٹی آئی کے ایک اور سینیئر رہنما سینیٹر علی ظفر نے بھی کہہ دیا تھا کہ شیر افضل مروت سچ بول رہے ہیں اور مولانا شیرانی گروپ اور مجلس وحدت المسلیمین ( ایم ڈبلیو ایم) کے ساتھ ہی اتحاد کی بات فائنل ہوئی تھی۔
اپنے ردعمل میں صاحبزادہ حامد رضا نے کہا کہ سنی اتحاد کونسل کا فیصلہ سابق چیئرمین پی ٹی آئی نے کیا تھا اس کے لیے میری طرف سے کوئی درخواست نہیں کی گئی تھی۔
پی ٹی آئی کے دوست اپنے معاملات گھر میں ہی حل کریں تو بہتر ہے اور سنی اتحاد کونسل کا فیصلہ عمران خان نے کیا تھا ، میری طرف سے کوئی درخواست نہیں کی گئی تھی ۔ انتخابی نشان سے لے کر مخصوص نشستوں تک میرے پاس بتانے کو وہ کچھ ہے کہ اگر میں نے بھی ٹاک شوز میں بیٹھ کر کچھ بول دیا تو کئی…
— Sahibzada Hamid Raza (@_SahibzadaHamid) March 15, 2024
انہوں نے کہا کہ انتخابی نشان سے لے کر مخصوص نشستوں تک میرے پاس بتانے کو بہت کچھ ہے اور اگر ٹاک شوز میں بیٹھ کر کچھ بول دیا تو کئی لوگ شکل دکھانے کے قابل نہیں رہیں گے۔
صاحبزادہ حامد رضا نے کہا کہ ’میری کمٹمنٹ سابق چیئرمین پی ٹی آئی کے ساتھ ہے اور ہمیشہ رہے گی‘۔
ان کا کہنا تھا کہ وہ محض میڈیا پبلسٹی کے لیے سابق چیئرمین پی ٹی آئی کا برا نہیں سوچ سکتے اسی لیے خاموش ہیں۔