بلوچستان سے خالی ہونے والی سینیٹ کی 7 جنرل، ٹیکنوکریٹ اور خواتین کی 2،2 نشتوں کے لیے مختلف سیاسی و مذہبی جماعتوں کے 36 امیدواروں نے کاغذات نامزدگی جمع کرا دیے۔
پاکستان پیپلز پارٹی (پی پی پی) اور اے این پی کے مشترکہ امیدوار عوامی نیشنل پارٹی خیبرپختونخوا کے صوبائی صدر ایمل ولی خان، پاکستان پیپلز پارٹی اور نیشنل پارٹی کے مشترکہ امیدوار جان محمد بلیدی نے کاغذات نامزدگی جمع کرا دیے۔
مزید پڑھیں
اس کے علاوہ پاکستان پیپلز پارٹی کے چنگیز جمالی، حسنہ بانو، سردار عمر گورگیج، بلال مندوخیل، طارق مسوری بگٹی، مسلم لیگ (ن) کے اورنگزیب کھیتران، راحت جمالی، آغا شاہ زیب درانی، سید الحسن مندوخیل، راحیلہ حمید درانی نے کاغذات نامزدگی جمع کرائے۔
جمعیت علما اسلام کے احمد خان خلجی، مولانا عبدالواسع، بی بی کلثوم، امان اللہ کنرانی، قاری رحمت اللہ کے کاغذات جمع کرائے گئے۔
بلوچستان عوامی پارٹی کے کہدہ بابر، انوارالحق کاکڑ، جماعت اسلامی کے زاہد اختر بلوچ، ڈاکٹر عطاالرحمان اورمولانا عبدالحق ہاشمی سمیت آزاد امیدواروں نے کاغذات نامزدگی جمع کرا دیے ہیں ۔
شیڈول کے مطابق ریٹرننگ آفیسر کی جانب سے کاغذات نامزدگی کی جانچ پڑتال 19 مارچ تک کی جائے گی جبکہ 21 مارچ تک کاغذات نامزدگی منظور یا مسترد ہونے کے خلاف اپیلیں دائر کی جاسکیں گی۔ ایپلیٹ ٹریبونل 25 مارچ تک اپیلوں پر فیصلے کریں گے۔
اسی طرح امیدواروں کی نظرثانی شدہ فہرست کی اشاعت 26 مارچ کو ہوگی اور 27 مارچ تک امیدوار دستبردار ہوسکیں گے۔
شیڈول کے تحت پولنگ 2 اپریل 2024 کو صبح 9 سے شام 4 بجے تک صوبائی اسمبلی بلوچستان کوئٹہ میں ہوگی۔
