پاکستان تحریک انصاف کے رہنما اور سابق وزیراعظم عمران خان کے چیف آف اسٹاف شبلی فراز نے صدر مملکت عارف علوی اور ڈاکٹر یاسمین راشد کی زمان پارک کی صورتحال پر ہونے والی گفتگو پر مبنی آڈیو لیک کو مریم نواز کی پروڈکشن قرار دے دیا۔
وی نیوز سے گفتگو کرتے ہوئے سینیٹر شبلی فراز نے کہا کہ ان کا مشاہدہ رہا ہے کہ اس طرح کی آڈیوز اور ویڈیوز پاکستان مسلم لیگ ن اور مریم نواز کی جانب سے کی جاتی ہیں۔
یاد رہے کہ محاصرہ کے دوران ڈاکٹر یاسمین راشد کی صدر مملکت سے فون پر بات چیت ہوئی تھی جس میں انھوں نے کشیدہ صورتحال پر تشویش کا اظہار کرتے ہوئے صدر مملکت سے گزارش کی تھی کہ وہ پی ٹی آئی چیئرمین عمران خان کو سمجھائیں کہ وہ (ضد) چھوڑ دیں باقی کل دیکھ لیا جائے گا بصورت دیگر پولیس اہلکار اور پارٹی کارکنان کی جانیں ضائع ہونے کا خدشہ ہے۔ یاسمین راشد کے کہنے کا مقصد یہ تھا کہ عمران خان گرفتاری دے دیں اگلے روز عدالت سے رابطہ کرلیا جائے گا۔
شبلی فراز نے کہا کہ وہ عارف علوی کا نہیں بلکہ صدر مملکت کا آفس تھا اور وہ فیڈریشن کے ایک نمائندہ اور آرمڈ فورسز کے سپریم کمانڈر ہیں لہٰذا ان کے دفتر سے اس طرح آڈیوز نکالنا شرمناک ہے۔ انھوں نے الزام عائد کیا کہ اس کلچر کا آغاز مسلم لیگ ن نے مریم نواز کی سربراہی میں کیا۔
منگل کو ہونے والے عمران خان کی رہائشگاہ کے پولیس محاصرے کا حوالہ دیتے ہوئے ان کا کہنا تھا کہ جو ظلم لاہور میں پاکستان تحریک انصاف کے مرد و خواتین کارکنوں پر ہو رہا تھا اس نے مقبوضہ کشمیر کے مناظر کی یاد دلادی۔ ان کا مزید کہنا تھا کہ اب ملک کو عدالتیں ہی بچا سکتی ہیں اور عوام کی امیدیں انہی سے وابستہ ہیں۔
