آسٹریا کے فٹبالر کرسٹوف بومگارٹنر نے تاریخ رقم کرتے ہوئے فٹبال کی دنیا میں اب تک کا تیز ترین گول اسکور کیا ہے۔
غیر ملکی خبر رساں ادارے ’دی گارڈین‘ کے مطابق بریٹیسلاوا میں سلوواکیا اور آسٹریا کے درمیان دوستانہ میچ کھیلا گیا جس میں آسٹریا نے میچ 0-2 سے جیت لیا۔ آسٹریا کے 24 سالہ فٹبالر نے مخالف ٹیم سلوواکیا کے خلاف میچ شروع ہوتے ہی ابتدائی 6 سیکنڈ میں پہلا گول اسکور کرکے نیا عالمی ریکارڈ قائم کردیا ہے۔
مزید پڑھیں
اس سے قبل یہ اعزاز جرمنی کے فٹبالر لوکاس پوڈولسکی کے نام رہا جنہوں نے 2013 میں ایکواڈور کے خلاف 7 سیکنڈ میں پہلا گول کیا تھا۔ آئرش فٹبالر شین لانگ نے ساوتھمپٹن کے لیے پریمیئر لیگ میں اب تک کا سب سے پہلا تیز ترین گول 2019 میں واٹفورڈ کے خلاف صرف 7.69 سیکنڈز میں کیا تھا۔
میچ کے میڈیا سے بات کرتے ہوئے کرسٹوف بومگارٹنر نے کہا کہ انہیں تیز ترین گول اسکور کرکے بے حد خوشی ہورہی ہے، یہ بہت سنسنی خیز تھا۔ آسٹریا کے کوچ نے کہا کہ یقیناً، ہم نے واقعی ایک اچھی شروعات کی۔
یاد رہے کہ ورلڈ کپ میں تیز ترین گول ترکی کے ہاکان سکور نے 2002 میں جنوبی کوریا کے خلاف 11 سیکنڈ میں کیا تھا۔
آسٹریا نے ترکی، سربیا اور سوئٹزرلینڈ کے خلاف دوستانہ میچوں کے ساتھ یورو 2024 کی تیاری جاری رکھی ہوئی ہے۔ جرمنی میں ہونے والے گروپ مرحلے میں ان کا مقابلہ فرانس، ہالینڈ اور پولینڈ یا ویلز سے ہوگا۔
