پاکستان کرکٹ بورڈ نے فیصلہ کیا ہے کہ قومی سطح کے 29 کرکٹرز 14 روزہ فٹنس کیمپ میں شامل ہوں گے، جس کا آغاز 26 مارچ سے ایبٹ آباد میں واقع ملٹری اکیڈمی کاکول میں ہوگا۔
پی سی بی کے اعلامیہ کے مطابق 29 کھلاڑی کاکول، ایبٹ آباد میں فٹنس کیمپ سے گزریں گے، جسے حکمت عملی کے مطابق پاک آرمی کے تعاون سے آئندہ سیریز اور ٹورنامنٹس کے لیے کھلاڑیوں کو تیار کرنے کی غرض سے ڈیزائن کیا گیا ہے۔
فٹںس کیمپ کا مقصد کھلاڑیوں کو نیوزی لینڈ کے خلاف ٹی20 ہوم سیریز، اور آئرلینڈ اور انگلینڈ کے خلاف T20I سیریز سمیت آئندہ آئی سی سی T20 ورلڈ کپ کے لیے تیار کرنا ہے، جو مشترکہ طور پر امریکا اور ویسٹ انڈیز میں کھیلا جائے گا۔
پی سی بی کے اعلامیہ کے مطابق فٹنس کیمپ ٹیم کی تیاری پر توجہ مرکوز کرے گا اور اس کا مقصد کھلاڑیوں کی جسمانی اور ذہنی طاقت کو بڑھانا ہے، کیمپ کا مقصد اس بات کو یقینی بنانا ہے کہ کھلاڑی ممکنہ چیلنجوں کا مقابلہ کرنے کے لیے بہترین حالت میں ہوں۔
’تجربہ کار ٹرینرز اور کوچز کی رہنمائی میں کھلاڑی ایک جامع تربیتی نظام سے گزریں گے جو ان کے فٹنس لیول، چستی، قیادت اور اسٹریٹجک سوچ اور میدان میں مجموعی کارکردگی کو بلند کرنے کے لیے تیار کیا گیا ہے۔‘
یہ فٹنس کیمپ 26 مارچ سے شروع ہوکر 8 اپریل کو اختتام پذیر ہوگا، جس میں شرکت کے لیے 29 کھلاڑیوں کو آج ہی کیمپ میں رپورٹ کرنے کی ہدایت کی گئی ہے۔
کاکول میں ہونیوالے اس فٹنس کیمپ میں شرکت کرنے والے کھلاڑیوں میں بابر اعظم، محمد رضوان، صائم ایوب، فخر زمان، صاحبزادہ فرحان، حسیب اللہ، سعود شکیل، عثمان خان، محمد حارث، سلمان علی آغا، اعظم خان، افتخار احمد، عرفان خان نیازی، شاداب خان، عماد وسیم، اسامہ میر، محمد نواز، مہران ممتاز، ابرار احمد، شاہین شاہ آفریدی، نسیم شاہ، محمد عباس آفریدی، حسن علی، محمد علی، زمان خان، محمد وسیم جونیئر، عامر جمال، حارث رؤف اور محمد عامر شامل ہیں۔
