وزیراعظم پاکستان شہباز شریف نے آج چیف جسٹس پاکستان جسٹس قاضی فائز عیسیٰ سے ملاقات کا فیصلہ کیا ہے۔
ذرائع کے مطابق وزیراعظم شہباز شریف آج دن 2 بجے سپریم کورٹ میں چیف جسٹس پاکستان سے ملاقات کریں گے، جبکہ قانونی ٹیم بھی ان کے ہمراہ ہوگی۔
واضح رہے کہ اسلام آباد ہائیکورٹ کے 6 ججوں کی جانب سے سپریم جوڈیشل کونسل کو لکھے گئے خط کے بعد نیا تنازعہ کھڑا ہو گیا ہے۔
مزید پڑھیں
گزشتہ روز انہی الزامات کا جائزہ لینے کے لیے چیف جسٹس پاکستان جسٹس قاضی فائز عیسیٰ کی زیر صدارت فل کورٹ اجلاس ہوا جس میں 6 ججوں کی جانب سے لکھے گئے خط پر غور کیا گیا۔ تاہم ابھی تک اعلامیہ جاری نہیں کیا گیا۔
اس سے قبل اسلام آباد ہائیکورٹ کے 6 ججوں کی جانب سے سپریم جوڈیشل کونسل کو لکھا گیا ایک خط سامنے آیا تھا۔
ہائیکورٹ کے ججوں نے سپریم جوڈیشل کونسل کو لکھے گئے خط میں موقف اختیار کیا تھا کہ عدلیہ میں خفیہ اداروں کی مداخلت اور ججز پر اثرانداز ہونے کے معاملے پر جوڈیشل کنونشن بلایا جائے۔
خط لکھنے والوں میں جسٹس محسن اختر کیانی، جسٹس طارق محمود جہانگیری، جسٹس بابر ستار، جسٹس سردار اعجاز اسحاق، جسٹس ارباب محمد طاہر اور جسٹس ثمن رفعت امتیاز شامل ہیں۔
خط کی کاپی سپریم کورٹ کے تمام ججوں کو بھی بھجوائی گئی تھی، جبکہ خط میں عدالتی امور میں ایگزیکٹو اور ایجنسیوں کی مداخلت کا ذکر کیا گیا تھا۔
