اسلام آباد کی عدالت نے حقیقی آزادی مارچ کے کیس میں پاکستان تحریک انصاف (پی ٹی آئی) کے سابق وائس چیئرمین شاہ محمود قریشی اور وزیراعلیٰ خیبرپختونخوا علی امین گنڈا پور کے ناقابل ضمانت وارنٹ گرفتاری جاری کردیے۔
جوڈیشل مجسٹریٹ نوید خان نے تھانہ کورال میں درج مقدمہ کی سماعت کا تحریری حکمنامہ جاری کردیا، جس کے مطابق فیصل جاوید خان اور علی نواز اعوان کو بری کیا گیا ہے۔
مزید پڑھیں
حکمنامے میں کہا گیا ہے کہ طلبی کے باوجود مسلسل عدم پیشی پر شاہ محمود قریشی اور علی امین گنڈا پور کے ناقابل ضمانت وارنٹ جاری کیے گئے ہیں۔
عدالت نے فیصل جاوید خان اور علی نواز اعوان کو عدم ثبوت کی بنا پر بری کردیا۔ جبکہ کیس کی مزید سماعت 20 مئی تک ملتوی کردی گئی۔
واضح رہے کہ بانی پی ٹی آئی عمران خان کو عدالت پہلے ہی حقیقی آزادی مارچ کے اس کیس میں بری کر چکی ہے۔
