اسلام آباد ہائیکورٹ نے ڈپٹی کمشنر اسلام آباد کا نام ای سی ایل میں ڈالنے کا حکم دیتے ہوئے کل صبح 9 بجے گرفتار کر کے عدالت میں پیش کرنے کا حکم دیدیا۔
عدالت العالیہ نے پی ٹی آئی کے رہنما شہریار آفریدی کی نظربندی کے کیس میں ڈپٹی کمشنر عرفان نواز میمن کے خلاف کارروائی کا حکم دیا ہے۔
مزید پڑھیں
توہین عدالت کیس میں آج کی سماعت کے تحریری حکمنامے کے مطابق اسلام آباد ہائیکورٹ نے حکم دیا ہے کہ آئی جی اسلام آباد دوسرے صوبوں کے ساتھ مل کر وارنٹ گرفتاری پر عمل کروائیں۔
عدالت نے ڈی جی ایف آئی اے کو بھی حکم دیا ہے کہ ایئرپورٹ، سی پورٹ یا بارڈر کراسنگ پر ڈپٹی کمشنر اسلام آباد نظر آئے تو گرفتار کرکے پیش کریں۔
ہائیکورٹ کے جج جسٹس بار ستار نے 4 صفحات پر مشتمل تحریری حکم نامہ جاری کیا ہے۔
اسلام آباد ہائیکورٹ کے مطابق ڈپٹی کمشنر اسلام آباد کی آج کی حاضری سے استثنیٰ کی درخواست منظور نہیں کی تھی اس کے باوجود وہ حاضر نہیں ہوئے۔
عدالت نے کہا ہے کہ انصاف کے نظام میں رکاوٹ بننے پر کیوں نا ڈپٹی کمشنر اسلام آباد کے خلاف کارروائی کی جائے۔
