الیکشن کمیشن نے قومی اسمبلی سمیت چاروں صوبائی اسمبلی کی مجموعی طور پر 23 نشستوں پر 21 اپریل کو ضمنی انتخاب کی تیاریوں کو حتمی شکل دیتے ہوئے امیدواروں کی حتمی فہرست جاری کردی ہے۔
الیکشن کمیشن نے قومی اسمبلی کی 6، صوبائی اسمبلی پنجاب کی 12، خیبر پختونخوا اسمبلی کی 2، صوبائی اسمبلی سندھ کی 1 اور بلوچستان اسمبلی کی 2 نشستوں پرضمنی انتخابات کے انعقاد کے لیے الیکشن شیڈول کا نوٹیفکیشن 13 مارچ 2024 کو جاری کیا تھا۔
ترجمان الیکشن کمیشن کے مطابق ان ضمنی انتخابات میں کل 239 امیدواران حصہ لے رہے ہیں، جن میں قومی اسمبلی کی نشستوں کے لیے 50 امیدوار مد مقابل ہیں جبکہ این اے 207 پر آصفہ بھٹو زرداری بلا مقابلہ کامیاب ہوچکی ہیں۔
اسی طرح صوبائی اسمبلی خیبرپختونخوا کی خالی نشستوں پر 23 امیدوار ضمنی انتخاب میں حصہ لے رہے ہیں، پنجاب میں 154 امیدواروں کے درمیان مقابلہ ہے، سندھ اسمبلی کے حلقہ پی ایس 80 دادو پر امیدوار زبیر احمد جونیجو بلا مقابلہ کامیاب ہوچکے ہیں۔
الیکشن کمیشن کے جاری کردہ اعلامیہ کے مطابق بلوچستان اسمبلی کی خالی نشستوں پر 12 امیدواروں کے درمیان مقابلہ ہوگا، ضمنی انتخابات کے انعقاد کے لیے الیکشن کمیشن نے ضروری سامان صوبائی الیکشن کمشنروں کو فراہم کردیا ہے۔
’ڈسٹرکٹ ریٹرننگ آفیسرز اور ریٹرننگ آفیسرز الیکشن شیڈول کے مطابق اپنا کام مکمل کر رہے ہی، ریٹرننگ افسروں کی جانب سے امیدواروں کی حتمی فہرستوں کی اشاعت کے ساتھ ہی بیلٹ پیپروں کی چھپائی کا آغاز کیا جا رہا ہے تاکہ بیلٹ پیپروں کی بروقت ترسیل یقینی بنائی جاسکے۔‘
ترجمان الیکشن کمیشن کے مطابق ضمنی انتخابات کے پُر امن انعقاد کے ضمن میں الیکشن کمیشن حکام ورزارت داخلہ، دفاع اور قانون نافذ کرنیوالے صوبائی اداروں سے رابطے میں ہیں۔
