پاکستان تحریک انصاف کے سینیئر رہنما و ممبر قومی اسمبلی لطیف کھوسہ نے کہا ہے کہ عمران خان اگلے ہفتے سائفر کیس میں بری ہو جائیں گے۔
نجی ٹی وی سے گفتگو کرتے ہوئے لطیف کھوسہ نے کہاکہ سائفر کیس عدالت کے روبرو پیش نہیں کیا گیا، جبکہ توشہ خانہ میں عمران خان کی سزائیں معطل ہوچکی ہیں۔
مزید پڑھیں
انہوں نے کہاکہ عمران خان کو ہٹاکر پارٹی کو تتر بتر کرنے کا فیصلہ لندن میں ہوا، سانحہ 9 مئی پر جوڈیشل کمیشن بنایا جائے۔
لطیف کھوسہ نے کہاکہ 9 سے 11 مئی تک عمران خان تحویل میں تھے تو حملہ کیسے کردیا۔ کور کمانڈر ہاؤس لاہور کو آگ پی ٹی آئی کے کارکنوں نے نہیں لگائی۔
ایک سوال کے جواب میں انہوں نے کہاکہ سابق آرمی چیف جنرل قمر باجوہ نے ایکسٹینشن مانگی تو نواز شریف نے دیدی۔
واضح رہے کہ بانی پی ٹی آئی اس وقت اڈیالہ جیل میں قید ہیں، اسلام آباد ہائیکورٹ نے توشہ خانہ میں ان کی سزائیں معطل کردی ہیں تاہم دیگر کیسز میں ابھی تک سزائیں بحال ہیں جس کی وجہ سے رہائی عمل میں نہیں آسکی۔
