بلوچستان کے ضلع خضدار میں بم دھماکا ہوا ہے جس کے نتیجے میں 2 افراد جاں بحق ہوگئے ہیں۔
میڈیا رپورٹس کے مطابق دھماکا عمر فاروق چوک کے قریب ہوا جہاں موٹرسائیکل کو ریموٹ کنٹرول بم کے ذریعے اڑایا گیا۔
ترجمان بلوچستان حکومت نے بتایا ہے کہ دھماکے کے نتیجے میں 2 افراد جاں بحق ہوئے جبکہ خواتین سمیت 5 افراد زخمی ہیں۔
مزید پڑھیں
ترجمان نے بتایا کہ دھماکا خیز مواد آئی ای ڈی کے ذریعے موٹر سائیکل میں نصب تھا، واقعہ کی تحقیقات کا حکم دیدیا گیا ہے۔
پاکستان سے دہشتگردی کے ناسور کا خاتمہ کریں گے، وفاقی وزیر داخلہ
دوسری جانب وفاقی وزیر داخلہ محسن نقوی نے خضدار میں بم دھماکے کی مذمت کرتے ہوئے افسوس کا اظہار کیا ہے۔
انہوں نے کہاکہ پاکستان سے دہشتگردی کے ناسور کا خاتمہ کریں گے، سیکیورٹی فورسز اس کے خاتمہ کے لیے پرعزم ہیں۔
بے گناہ لوگوں کو نشانہ بنانے والوں کو معاف نہیں کیا جائے گا، وزیراعلیٰ بلوچستان
اِدھر وزیراعلیٰ بلوچستان سرفراز بگٹی نے دھماکے کی مذمت کرتے ہوئے کہا ہے کہ معصوم افراد کو نشانہ بنانا غیر انسانی اور بزدلانہ فعل ہے۔
انہوں نے کہاکہ معصوم اور بے گناہ لوگوں کو نشانہ بنانے والوں کو معاف نہیں کیا جائے گا۔ دہشت گردی کی کارروائیوں میں ملوث عناصر کی بیخ کنی کریں گے۔
وزیر اعلیٰ بلوچستان نے دھماکے میں شہید افراد کے پسماندگان سے اظہار تعزیت کیا ہے جبکہ زخمیوں کو بہترین طبی سہولیات فراہم کرنے احکامات جاری کیے ہیں۔
