کراچی کے علاقے مانسہرہ کالونی میں وین پر خودکش حملے کے نتیجے میں 3 افراد زخمی ہوئے، پولیس کی ابتدائی معلومات کے مطابق جس وقت گاڑی میں دھماکا ہوا اس وقت فائرنگ بھی کی گئی جس کے نتیجے میں 3 افراد زخمی ہوئے انہیں جناح اسپتال منتقل کر دیا گیا ہے۔
ایس ایس پی ملیر طارق مستوئی کے مطابق شرافی گوٹھ تھانے کی حدود میں وین پر خودکش حملہ ہوا ہے جس میں 5غیر ملکی سوار تھے، وین میں سوار تمام غیر ملکی محفوظ ہیں جنہیں محفوظ مقام پر منتقل کر دیا گیا ہے۔
مزید پڑھیں
ابتدائی معلومات کے مطابق غیرملکی ایکسپورٹ پروسسنگ زون میں کام کرتے ہیں، وین کو موٹرسائیکل پر سوار خود کش بمبار کے ذریعے نشانہ بنایا گیا، جائے وقوع سے کلاشنکوف، دستی بم سے بھرا بیگ بھی ملا ہے۔
اسپتال ذرائع کے مطابق ابتک 3 زخمیوں کو جناح اسپتال منتقل کیا گیا ہے، زخمیوں میں نور محمد، لنگر خان، سلمان رفیق شامل ہیں، زخمی ایمرجینسی میں زیر علاج ہیں، 2 کی حالت تشویشناک ہے۔ زخمیوں میں کوئی غیر ملکی شامل نہیں، زخمیوں میں 2 سیکیورٹی گارڈ اور ایک راہگیر شامل ہے، پولیس کے مطابق مارا گیا دوسرا دہشت گرد بھی خود کش بمبار تھا، دہشت گرد کے جسم سے خود کش جیکٹ اور گرینیڈ بندھا ہوا تھا۔
ڈی آئی جی ایسٹ کا کہنا ہے کہ ابتدائی تفیتش کے مطابق حملہ آور پیدل تھے، حملہ آوروں کے پاس 6 دستی بم،ایس ایم جی، اور 3 میگزین تھے، حملہ آوروں کے پاس پیٹرول کی 2 بوتلیں بھی موجود تھیں جو ایک بیگ میں تھیں۔
ملازمین کی جس وین کو نشانہ بنایا گیا اس کے پیچھے اسی کمپنی کے افسر کی گاڑی بھے تھی اور افسر کی گاڑی کے پیچھے کمپنی کے سیکیورٹی گارڈز کی گاڑی تھی، ابتدائی طور پردہشت گردوں نے وین پر فائرنگ کی، وین کے پیچھے موجود سیکیورٹی گارڈ نے جوابی فائرنگ کی، سیکیورٹی گارڈز کی فائرنگ سے ایک دہشت گرد مارا گیا، جبکہ دوسرے دہشت گرد نے وین کے قریب آکر خود کو دھماکے سے اڑایا۔
