ایران کی جانب سے اسرائیل کے خلاف کی گئی کارروائی پر افغان حکومت کا ردعمل بھی سامنے آگیا ہے۔
افغان وزارت خارجہ نے اپنے ایک بیان میں کہا ہے کہ ایران کی جانب سے اسرائیل پر کیا گیا حملہ بالکل درست اور جائز ہے۔
مزید پڑھیں
بیان میں کہا گیا ہے کہ ایران نے شام میں قونصلیٹ پر کیے گئے حملے کا جواب دیا جو جائز دفاعی عمل ہے۔
افغان وزارت خارجہ نے کہاکہ اسرائیل نے ایرانی قونصلیٹ پر حملہ کرکے عالمی قوانین کی خلاف ورزی کی تھی جس کا اب جواب سامنے آیا ہے۔ دنیا کو چاہیے کہ کشیدگی کو بڑھنے سے روکنے کے لیے صیہونی ریاست کے جرائم کو روکے۔
واضح رہے کہ ایران نے دمشق میں قونصل خانے پر کیے گئے حملے کا اسرائیل کو بھرپور جواب دیا ہے اور 300 کے قریب ڈرون اور میزائل فائر کیے ہیں۔
دوسری جانب اسرائیل نے بھی ایران کی جانب سے کیے گئے حملے کی تصدیق کی ہے۔
ادھر اسرائیل اور ایران میں بڑھتی کشیدگی پر دنیا بھر کے ممالک نے اپنی تشویش کا اظہار کیا ہے۔
امریکا نے اسرائیل کو باور کرایا ہے کہ ہم ایران کے خلاف کسی جارحانہ آپریشن کا حصہ نہیں بنیں گے۔ اس لیے کسی بھی کارروائی سے قبل واشنگٹن کو اعتماد میں لیا جائے۔
