وزیراعلیٰ گلگت بلتستان حاجی گلبر خان نے ہدایات دیتے ہوئے کہا ہے کہ ملک کو درپیش سیکیورٹی چیلنجز کو مد نظر رکھتے ہوئے دیامر بھاشا ڈیم پر کام کرنے والے چینی شہریوں اور غیر ملکی انجینیئرز کی فول پروف سیکیورٹی کو یقینی بنایا جائے۔
دیامر بھاشا ڈیم کے سیکیورٹی انتظامات کے حوالے سے دی جانے والی بریفنگ کے موقع پر گفتگو کرتے ہوئے وزیراعلیٰ نے کہاکہ پاکستان کی خوشحالی کے لیے اہم منصوبوں کی افادیت کو مدنظر رکھتے ہوئے ملک دشمن عناصر سازشیں کرسکتے ہیں۔ لہٰذا جدید خطوط پر چینی شہریوں کی سیکیورٹی کے لہے انتظامات کیے جائیں۔
مزید پڑھیں
وزیراعلیٰ نے کہاکہ واپڈا سیکیورٹی سسٹم کو بہتر اور موثر بنانے کے لیے چیئرمین واپڈا سے رابطہ کیا جائے گا تاکہ واپڈا کے سیکیورٹی ملازمین کی بہتر ٹریننگ اور جدید ہتھیار فراہم کیے جا سکیں۔
اجلاس میں گلگت بلتستان سکاؤٹس، پولیس، انتظامیہ اور دیگر اعلیٰ افسران نے شرکت کی۔
وزیراعلیٰ نے اس موقع پر ڈپٹی کمشنر دیامر کو ہدایت کی کہ شتنگ نالہ اور ہڈر نالہ کے مقام پر روڈ کی وجہ سے گھروں کو ہونے والے نقصانات کاازالہ کیا جائے اور تعمیراتی کام مکمل ہونے تک رہائشیوں کو متبادل جگہ پر منتقل کیا جائے۔
