خیبرپختونخوا میں 2 روز کے دوران بارشوں کے باعث حادثات کے نتیجے میں 7 افراد جاں بحق جبکہ 10 افراد زخمی ہوگئے۔
پی ڈی ایم اے کی جانب سے جاری کی گئی رپورٹ کے مطابق مرنے والے افراد میں 4 بچے اور ایک خاتون بھی شامل ہے۔
رپورٹ میں بتایا گیا ہے کہ مختلف اضلاع میں دیواریں اور چھتیں گرنے سے مجموعی طور پر 84 مکانوں کو نقصان پہنچا، جن میں سے 15 گھر مکمل طور پر تباہ ہوگئے جبکہ 69 گھروں کو جزوی نقصان پہنچا۔
مزید پڑھیں
پی ڈی ایم اے کے مطابق تیز بارش کے باعث جانی و مالی حادثات صوبے کے مختلف اضلاع دیر اپر و لوئر، چترال لوئر، سوات، باجوڑ، شانگلہ، مانسہرہ، مہمند اور مالاکنڈ میں رونما ہوئے۔
وزیراعلیٰ خیبر پختونخوا کی جانب سے متعلقہ ضلعی انتظامیہ اور اداروں کو متاثرہ خاندان کو فوری طور پر امداد اور زخمیوں کو بہترین طبی سہولیات کی فراہمی یقینی بنانے کی ہدایت کی گئی ہے۔
پی ڈی ایم اے کی جانب سے متاثرہ اضلاع کے متاثرین کو امدادی سامان فراہم کر دیا گیا، لوئر چترال کے متاثرین کے لیے 200 خیمے راوانہ کیے گئے ہیں۔
پی ڈی ایم اے کی جانب سے متعلقہ ضلعی انتظامیہ کو اضلاع میں امدادی سرگرمیاں مزید تیز کرنے کی ہدایت کی گئی ہے، جبکہ چترال لوئر میں کئی بند شاہراہوں کو عام ٹریفک کے لیے کھول دیا گیا ہے۔
پی ڈی ایم اے کے مطابق مزید بند سٹرکوں کو فوری ٹریفک کے لیے بحال کرنے کے لیے ضلعی انتظامیہ اور متعلقہ اداروں کو ہدایت جاری کی گئی ہیں۔
پی ڈی ایم اے نے بتایا ہے کہ ایمرجنسی آپریشن سینٹر مکمل طور پر فعال ہے، عوام کسی بھی نا خوشگوار واقعے کی اطلاع 1700 پر دیں۔
