ملکی صحافت پر اسٹیبلشمنٹ کا قبضہ ہے، عارف حمید بھٹی

سینیئر صحافی اور تجزیہ کار عارف حمید بھٹی نے کہا ہے کہ جب تک ججوں اور جرنیلوں سمیت صحافیوں کا بھی احتساب نہیں کیا جاتا ملک میں بہتری نہیں آسکتی، اس وقت ملک میں صحافت صفر ہوچکی اور اسٹیبلشمنٹ کا اس پر مکمل قبضہ ہے۔

وی نیوز کو انٹرویو دیتے ہوئے انہوں نے کہاکہ اس وقت صحافت کا یہ حال ہے کہ ایک ایک ٹکر پر بھی چینلز مالکان اور صحافیوں کی کھنچائی ہوتی ہے۔

عارف حمید بھٹی نے کہاکہ 90 فیصد صحافی سیاسی جماعتوں کے آلہ کار کے طور پر کام کررہے ہیں۔

ایک سوال کے جواب میں انہوں نے کہاکہ ماضی میں ہونے والا چارٹر آف ڈیموکریسی بھی ایک دھوکہ تھا، ہر سیاستدان عوام کی مرضی کی بجائے اسٹیبلشمنٹ کے ذریعے اقتدار میں آنے کے لیے چاپلوسی کرتا ہے۔

انہوں نے کہاکہ عمران خان سمیت ماضی کی کسی بھی حکومت نے احتساب کے بجائے انتقام ہی لیا ہے۔

عثمان بزدار کو پنجاب کی باگ ڈور دینا عمران خان حکومت کا سیاہ باب ہے

عارف حمید بھٹی نے کہاکہ عثمان بزدار جیسے کرپٹ آدمی کے ہاتھ میں پنجاب کی باگ ڈور دینا بھی عمران حکومت کا سیاہ باب ہے۔

انہوں نے مزید کہا کہ مجھے کال کوٹھری میں جانے سے ڈر لگتا ہے لیکن سچ بولنا ہم پر فرض ہے۔

عارف حمید بھٹی نے کہاکہ مؤرخ لکھے گا کہ آج کا پاکستان خوف کی وجہ سے زبان بندی کا شکار تھا۔