وزیراعلیٰ خیبرپختونخوا علی امین گنڈا پور نے کہا ہے ’ لوگوں کو اٹھانے والے سوچیں کہ ان کے بھی گھر ہیں، ان کی بھی فیملیز ہیں، اگر آپ غیر قانونی طور پر کسی کے گھر میں جاؤ گے، انہیں ہراساں کرو گے تو یہ ضرور سوچو کہ تمہارے بھی گھر اور فیملیز ہیں۔‘
جب تک حقیقی آزادی نہیں ملے گی، ہم ڈٹے اور کھڑے رہیں گے، حقیقی آزادی ملنے تک یہ جنگ جاری رہے گی، یہ قوم مزید تجربات برداشت نہیں کرسکتی۔
وزیراعلیٰ خیبرپختونخوا علی امین گنڈا پور نے اسلام آباد میں جوڈیشل کمپلیس کے باہر میڈیا سے گفتگو کرتے ہوئے کہا کہ پی ڈی ایم ون کا تجربہ ہوا، رزلٹ سب کے سامنے ہے، ملک کہاں سے کہاں چلا گیا، اس کے بعد نگراں حکومت اور اب پھر پی ڈی ایم 2 لا کر ایک اور تجربہ کیا گیا ہے، یہ قوم مزید تجربات برداشت نہیں کرسکتی، اس لیے ہوش کے ناخن لیں۔
مزید پڑھیں
’کبھی لندن پلان، کبھی کون سا پلان، آپ لوگ کررہے ہیں تجربے، اس سے نکلیں، عوام کا سوچیں، 25 کروڑ عوام کے مسائل کے حل کے بارے میں سوچیں۔‘
علی امین گنڈا پور نے کہا کہ گزشتہ 2 سال سے جو چھاپے مارنے میں ملوث ہیں ان کی فیملیز کو انہیں سمجھانا چاہیے، لوگوں کو منہ دکھانے کے قابل نہیں، ہر کسی کو اٹھا لیتے ہیں، بانی پی ٹی آئی نے کہا پاکستان کے لیے بیٹھنے کے لیے تیار ہوں۔
’ لوگوں کو اٹھانے والے سوچیں کہ ان کے بھی گھر ہیں، ان کی بھی فیملیز ہیں، اگر آپ غیر قانونی طور پر کسی کے گھر میں جاؤ گے، انہیں ہراساں کرو گے تو یہ ضرور سوچو کہ تمہارے بھی گھر اور فیملیز ہیں۔‘
عوام نے انتخابات میں اشارہ دےدیاہے، عوام کا اشارہ سمجھ جاؤ، اصلاح کے لیے تیار نہیں تو سزا کے لیے تیار ہو، علی امین گنڈاپور کی جوڈیشل کمپلیکس کے باہر گفتگو pic.twitter.com/1zGT5P4NLP
— Ahmad Hassan Bobak (@ahmad_bobak) April 17, 2024
انہوں نے کہا کہ ڈی آئی خان میں لوگوں کو پکڑ پکڑ کر جے یو آئی ایف میں شامل کرایا گیا، پی ٹی آئی کا مینڈیٹ چوری ہوا، اب مجھے الیکشن لڑنے کی ضرورت ہی نہیں ہے، میرا ورکر بھی ان کو ہرا دے گا۔
علی امین گنڈا پور نے جمعیت علمائے اسلام ف کے سربراہ کی جانب اشارتا کہا ’مولانا آپ کا ریٹ لگوا رہا ہے، پھر لے دے کرے گا، اپنے آپ کو استعمال کر کے ڈیل کرے گا، کشمیر کمیٹی لے گا، کوئی گورنرشپ لے گا۔
ایک سوال کے جواب میں انہوں نے کہا کہ صوبے میں روٹی سستی کر کے دکھائیں گے۔ ’یہ کوئی طریقہ نہیں ہے کہ حکومت کوئی حکم جاری کرے اور اس پر عملدرآمد نہ ہو، پنجاب میں حکومت ٹک ٹاک پر چل رہی ہے، انہوں نے مطالبہ کیا کہ پنجاب میں عوام کو ہیلتھ کارڈ دیا جائے۔‘
