وزیر اعظم محمد شہباز شریف نے متحدہ عرب امارات کو موسمیاتی تبدیلی کے چیلنجز سے نمٹنے کے لیے مشترکہ اقدامات پر زور دیا ہے اور اس شعبے میں دونوں ممالک کے درمیان تعاون کو مضبوط کرنے کی تجویز دی ہے۔
مزید پڑھیں
جمعہ کو وزیراعظم آفس سے جاری بیان کے مطابق وزیر اعظم محمد شہباز شریف اور متحدہ عرب امارات (یو اے ای) کے صدر شیخ محمد بن زید النہیان کے درمیان ٹیلی فون پر رابطہ ہوا ہے جس میں وزیر اعظم شہباز شریف نے متحدہ عرب امارات کی حکومت اور عوام کے شدید بارش اور اس کے نتیجے میں پیدا ہونے والی سیلابی صورت حال کے دوران بلند حوصلے، مضبوط عزم اور بے مثال کارکردگی کو سراہا ۔
وزیر اعظم شہباز شریف نے متحدہ عرب امارات کے صدر کی تعریف کی جنہوں نے ایک بار پھر اپنی شاندار قائدانہ صلاحیتوں کا مظاہرہ کیا اور متحدہ عرب امارات کے عوام کی فلاح و بہبود کو یقینی بنانے میں اپنا بھرپور کردار ادا کیا۔
وزیراعظم شہباز شریف نے کہا کہ پاکستان میں بھی حالیہ دنوں میں شدید بارشیں ہوئی ہیں جس کے نتیجے میں کئی قیمتی جانوں کا ضیاع ہوا ہے۔
وزیر اعظم نے متحدہ عرب امارات کے سربراہ سے گفتگو کے دوران موسمیاتی تبدیلی کے چیلنج سے نمٹنے کے لیے مشترکہ اقدامات پر بھی زور دیا اور تجویز دی کہ دونوں ممالک اس شعبے میں اپنے تعاون کو مضبوط کریں۔
متحدہ عرب امارات کے صدر نے وزیراعظم کی نیک تمناؤں کو سراہتے ہوئے پاکستان میں بارشوں اور سیلاب سے متاثرہ لوگوں کے لیے اپنی نیک تمناؤں اور جذبات کا اظہار کیا۔ دونوں رہنماؤں نے کثیر جہتی شعبوں میں دوطرفہ تعاون کو مزید بڑھانے کے عزم کا بھی اعادہ کیا۔
