وزیراعظم شہباز شریف نے وزیراعلیٰ پنجاب پرویز الٰہی کے اعتماد کے ووٹ کے معاملے پر اپنی جماعت اور پیپلزپارٹی کے رکن پر مشتمل کمیٹی بنا دی۔
شہباز شریف کی زیر صدارت مسلم لیگ (ن) کے رہنماؤں کا مشاورتی اجلاس ہوا جس میں پنجاب کی سیاسی صورتحال پرتبادلہ خیال کیا گیا۔
ذرائع کے مطابق وزیراعظم نے پیپلز پارٹی اور ن لیگ کے سینئیر رہنماؤں پرمشتمل کمیٹی بنادی جس میں وزیرقانون اعظم نذیر تارڑ، سعد رفیق، رانا ثنا اللہ، عطا تارڑ اور پیپلز پارٹی سے حسن مرتضیٰ شامل ہوں گے۔
ذرائع نے بتایا کہ کمیٹی پنجاب میں اعتماد کے ووٹ سے متعلق متحرک ہو گی، کمیٹی کا مقصد وزیراعلیٰ کے اعتماد کے ووٹ لینے کے دن تمام قانونی اور آئینی پہلوؤں کا جائزہ لینا ہے۔
اجلاس میں شرکا نے گفتگو کی کہ پچھلی بار اسپیکرپنجاب اسمبلی اور وزیر اعلیٰ کے الیکشن میں دھاندلی ہوئی، اس بارپرویزالٰہی اورپی ٹی آئی کوکسی صورت ایوان کاماحول خراب نہیں کرنے دیں گے، ن لیگ کےارکان صوبائی اسمبلی بھی بھرپور دفاع کریں گے۔
ذرائع کے مطابق ہائی کورٹ میں 11 جنوری کو قانونی ٹیم مکمل تیاری کے ساتھ پیش ہوگی۔
