بھارتی اپوزیشن جماعت انڈین نیشنل کانگریس کے رہنما راہول گاندھی نے کہا ہے کہ بھارت کا میڈیا عوام کے مسائل اجاگر کرنے کے بجائے مودی کے گن گاتا ہے۔
مزید پڑھیں
ایک انتخابی جلسے سے خطاب کرتے ہوئے انہوں نے کہا کہ بھارت کے سب سے بڑے مسائل بیروزگاری اور مہنگائی ہیں لیکن میڈیا کو دیکھیں تو لگتا ہے کہ سب سے ضروری مسئلہ امبانی کی شادی ہے۔
راہول گاندھی نے کہا، ’میڈیا پر 24 گھنٹے نریندر مودی کا چہرہ دکھایا جاتا ہے، کبھی وہ سمندر کی تہہ میں جارہے ہوتے ہیں اور کبھی آپ انہیں جہاز میں اڑتے ہوئے دیکھیں گے، کبھی انہیں تھالی بجاتے ہوئے دیکھیں گے تو کبھی وہ آپ کو موبائل فون کی روشنی دکھانے کو بولیں گے۔‘
انہوں نے کہا، ’یہ بھارتی میڈیا میں کون لوگ بیٹھے ہیں جو بھارتی عوام اور ان کے مسائل پر بات ہی نہیں کرتے، میں نے میڈیا اداروں کے مالکان اور بڑے بڑے اینکرز کی فہرست بنائی ہے، یہ تمام لوگ اونچی ذاتوں اور طبقے سے تعلق رکھتے ہیں، بھارت میں غریب لوگوں اور نچلی ذاتوں کی 50 فیصد آبادی ہے جن میں سے ٹی وی پر ایک بھی اینکر آپ کو نظر نہیں آئے گا۔‘
انہوں نے کہا کہ 2 سے 3 فیصد لوگوں کو بھارتی میڈیا میں ملازمتیں ملتی ہیں، 15 سے 20 فیصد لوگ بھارتی میڈیا کو کنٹرول کرتے ہیں اور 24 گھنٹے یہ لوگ نریندر مودی کے گن گاتے ہیں۔ انہوں نے کہا کہ یہ تو طے ہے کہ میڈیا کے لوگوں کا تعلق عام بھارتی عوام سے نہیں اور نہ یہ ان میں سے ہیں۔
راہول گاندھی نے کہا کہ لوگوں نے دیکھا کہ کسانوں نے اپنے مسائل پر احتجاج کیا تو میڈیا نے انہیں دہشتگرد بناکر پیش کیا، بھارتی میڈیا بیروزگاری اور مہنگائی کی بات نہیں کرتا، بھارتی میڈیا کے لوگوں کا کام عوام کی توجہ اصل مسائل سے ہٹانا ہے۔