اداکارہ سدرہ نیازی بلاشبہ شوبز انڈسٹری کی ایسی ابھرتی ہوئی اداکارہ ہیں جنہوں نے بہت کم عرصے میں اپنی اداکاری سے سب کو متاثر کیا، تاہم اداکارہ دیگر فنکاروں سے اس لیے بھی مختلف ہیں کیونکہ وہ اپنی ذاتی زندگی کو سوشل میڈیا کی نظروں سے دور رکھنا پسند کرتی ہیں۔
ڈراما سیریل ’سکون‘ میں اداکار احسن خان کے مدمقابل اداکاری کے جوہر بکھیرنے والی سدرہ نیازی نے حال ہی میں احسن خان کے انٹرویو میں شرکت کی۔’سٹنگ ود سدرہ نیازی’ میں میزبان احسن خان نے ڈرائیونگ کے دوران اداکارہ سے گپ شپ لگائی اور کئی موضوعات کو اپنی گفتگو میں شامل کیا۔
دوران انٹرویو احسن خان نے گھریلو بیوی ہونے کی خوبیوں پر سوال کیا جس کے جواب میں اداکارہ نے پہلی بار اپنی شادی شدہ زندگی پر کھل کر گفتگو کی اور ساتھ ہی اپنے مداحوں کو حیران کردیا۔اداکارہ سدرہ نیازی نے بتایا کہ انہیں صرف دال چاول بنانے آتے ہیں، اور انکے شوہر ہر حال میں انکا ساتھ دیتے ہیں۔
احسن خان نے اداکارہ سے کم عمری میں شادی کرنے پر سوال کیا تو اداکارہ نے کہا کہ انہیں کم عمری میں شادی کرنے کا کوئی پچھتاوا نہیں ہے۔
انہوں نے انکشاف کیا کہ وہ بہت ’انٹروورٹ‘ ہیں اور انکا میڈیا انڈسٹری میں قدم رکھنا انکے سسرال والوں اور خاندان کے لیے حیران کن تھا۔ جب انہوں نے میرے کام اور لگن کو دیکھا تو انہوں نے بھی میرے کام کو سراہا۔
علاوہ ازیں سدرہ نیازی اپنی شادی کی دیگر تفصیلات شیئر کرنے سے تو گریز کرتی نظر آئیں تاہم انکا شادی شدہ ہونے کا انکشاف مداحوں کیلئے کافی حیران کن ثابت ہوا۔
