اپوزیشن مینڈیٹ دینے والوں کی توہین کررہی ہے، اسپیکر پنجاب اسمبلی ملک احمد خان

اسپیکر پنجاب اسمبلی ملک محمد احمد خان نے کہا کہ ضمنی الیکشن میں کوئی دھاندلی نہیں ہوئی، اپوزیشن والے مینڈیٹ دینے والوں کی توہین کررہے ہیں۔

اسپیکر پنجاب اسمبلی ملک محمد احمد خان نے میڈیا سے گفتگو کرتے ہوئے کہا کہ ضمنی انتخاب کے دوران قصور میں بھی الیکشن ہوا لوگوں نے دیکھا رزلٹ شفاف تھے۔ ضمنی الیکشن میں دھاندلی کا شور مچانے والی اپوزیشن مینڈیٹ دینے والوں کی توہین کر رہی ہے۔

ملک احمد خان نے کہا کہ عوام نے نواز شریف اور شہباز شریف پر اعتماد کیا ہے۔ عوام نے جو مینڈیٹ دیا ہے اس پر ہمیں عوامی مسائل کو حل کرنا ہوگا۔ انتشار اور افراتفری سے لوگ تنگ آچکے ہیں۔

اسپیکر ملک محمد احمد خان کا کہنا تھا کہ عوامی نمائندوں کو اپنے حق کے لیے آواز اٹھانا ہوگی۔ اپوزیشن والوں نے اجلاس میں عوامی مسائل کی کبھی بات نہیں کی۔

انہوں نے مزید کہاکہ 12 کروڑ عوام کے مسائل کے حل کے لیے بات کرنی چاہیے۔ ہمارا موقف یہی ہے کہ عوام نے جو مینڈیٹ دیا ہے اور مسلم لیگ ن پر جس اعتماد کا اظہار کیا ہے اس پر پورا اترنا چاہیے۔