وفاقی وزیر قانون اعظم نذیر تارڑ نے کہا ہے کہ سوشل میڈیا کی بندش کا مسئلہ صرف پاکستان میں نہیں بلکہ امریکا، کینیڈا اور آسٹریلیا میں بھی ایسے مسائل موجود ہیں۔
وفاقی وزیر قانون نے لاہور میں عاصمہ جہانگیر کانفرنس سے خطاب کرتے ہوئے کہاکہ انٹرنیٹ استعمال کرنے والوں کے رویے پر مزید پالیسی گائیڈ لائنز متعارف کرائیں گے، حکومت سوشل میڈیا سے متعلق قانون سازی پر کام کررہی ہے۔
مزید پڑھیں
انہوں نے کہاکہ میں اظہار رائے کا حامی ہوں، ڈیجیٹل رائٹس اور قابل اعتراض مواد کے معاملے میں جلد بہتری آئے گی۔
اعظم نذیر تارڑ نے کہاکہ مسلم لیگ ن کی اتحادی حکومت کے دور میں ایک کمیٹی بنائی گئی تھی جس نے سوشل میڈیا کے حوالے سے معاملات کو دیکھنا تھا مگر پھر نگراں حکومت آنے کی وجہ سے کام رک گیا۔
وفاقی وزیر نے کہاکہ اب ہم نے سوشل میڈیا سے متعلق پالیسی پر دوبارہ کام شروع کردیا ہے۔ جبکہ میٹا اور دیگر سوشل میڈیا پلیٹ فارمز کے ساتھ مشاورت کررہے ہیں۔
واضح رہے کہ پاکستان میں سوشل میڈیا سائٹ ’ایکس‘ کو بندش کا سامنا ہے، اور اس حوالے سے اسلام آباد ہائیکورٹ نے بھی حکومت سے جواب طلب کر رکھا ہے۔
