لاہور ہائیکورٹ نے پنجاب بھر کے ڈپٹی کمشنرز کو پولی تھین بیگزکو تلف کرنے سے متعلق پالیسی بنانے کی ہدایت کرتے ہوئے صوبے بھر کی صنعتوں کو فضلے اور آلودگی کا باعث نہ بننے والی ڈیوائس لگانے کا حکم دیاہے۔
لاہور ہائیکورٹ کے جسٹس شاہد کریم نے شہری ہارون فاروق سمیت دیگر کی درخواستوں پر سماعت کا تحریری حکم جاری کردیا ہے جس کے مطابق عدالت نے ہرڈپٹی کمشنر کو پولی تھین بیگ اکھٹے کرنے اور انکو تلف کرنے کے لیے پالیسی بنانے کا حکم دیا ہے۔
عدالتی فیصلے کے مطابق آئندہ سماعت پر پنجاب کے تمام اضلاع کی پالیسی عدالت میں پیش کی جائے جس میں شہریوں پر عائد فیس کو بھی پالیسی کا حصہ بنایا جائے۔
عدالتی فیصلے کے مطابق پنجاب بھر کی صنعتوں کو فضلے اور آلودگی کا باعث نہ بننے والی ڈیوائس لگانے کی ہدایت کرتے ہوئے چیمبر آف کامرس سے اس ضمن میں 4 ہفتوں میں رپورٹ طلب کرلی ہے۔
عدالت نے آلودگی کا باعث بننے والی فیکٹریوں اور اینٹوں کے بھٹوں کے خلاف کاروائیاں جاری رکھنے کا حکم دیا ہے، سرکاری وکیل نے عدالت کو آگاہ کیا ہے کہ لاہور، شیخوپورہ اور ننکانہ کے محکمہ ماحولیات کے افسروں کے تبادلے کردیے گئے ہیں، آئندہ سماعت 3 مئی کو ہوگی۔
