سولومن جزائر میں چین کے حامی وزیر اعظم یرمیاہ منیل وزیر اعظم منتخب ہوگئے، جس سے یہ ظاہر ہوتا ہے کہ یہ ملک چین کا قریبی اتحادی رہے گا۔ یرمیاہ منیل نے جمعرات کو وزیر اعظم کا ووٹ حاصل کیا، اور اپنے حریف میتھیو ویل کو 13 ووٹوں سے شکست دی۔
مزید پڑھیں
سابق وزیر اعظم مناسے سوگاورے کی جگہ لینے والے یرمیاہ منیل مغرب کے سخت ناقدین مانے جاتے ہیں، مسٹر منیل اس وقت وزیر خارجہ تھے جب 2019 میں سولومن نے تائیوان سے علیحدگی اختیار کرتے ہوئے اپنی سفارتی شناخت چین کے ساتھ جوڑنے کا انتخاب کیا تھا۔
انہوں نے پہلے ہی اشارہ دیا تھا کہ وہ چین کے ساتھ ملک کے قریبی تعلقات کو جاری رکھیں گے، جبکہ ان کے ناقدین کا یہ ماننا ہے کہ منتخب وزیر اعظم روایتی مغربی شراکت داروں کے ساتھ کم تصادم والی پالیسی کو اپنائیں گے۔
دوسری جانب آسٹریلیا کے وزیر اعظم انتھونی البانی نے یرمیاہ منیل کو مبارکباد دیتے ہوئے کہا تھا کہ وہ ان کے ساتھ مل کر کام کرنے کے منتظر ہیں۔ آسٹریلیا اور سولومن جزائر قریبی دوست ہیں اور ہمارا مستقبل آپس میں جڑا ہوا ہے۔
واضح رہے سولومن کے سابق وزیر اعظم مناسے سوگاورے ان انتخابات میں نئے منتخب شدہ وزیر اعظم یرمیاہ منیل کی حمایت کرتے رہے ہیں۔
سیکڑوں جزیروں پر مشتمل اس غریب ملک میں تقریباً 7لاکھ لوگ آباد ہیں۔ 80فیصد سے زیادہ لوگ دارالحکومت ہونایرا سے باہر رہتے ہیں اور انہیں بجلی، اسکول، اسپتالوں اور ماس ٹرانسپورٹ جیسی بنیادی ضروریات تک آسان رسائی نہیں ہے۔
