حج 2024 کے لیے فلائٹ آپریشن 9 مئی سے 9 جون 2024 تک جاری رہے گا، پہلے 15 روز تمام پروازیں براہ راست مدینہ منورہ ایئر پورٹ اتریں گی۔
ترجمان وزارت مذہبی امور نے بتایا کہ 24 مئی تا 9 جون بیشتر پروازیں جدہ ایئرپورٹ پر اتریں گی، فلائٹ آپریشن کے پہلے روز 11 پروازوں کے ذریعے 2160 عازمین سعودی عرب روانہ ہوں گے۔
مزید پڑھیں
اسلام آباد سے 3 پروازوں کے ذریعے 680 عازمین حج سعودی عرب روانہ ہوں گے،کراچی سے 2 پروازوں کے ذریعے 330 مسافر روانہ ہوں گے،لاہور سے 3 پروازوں کے ذریعے 670 مسافر روانہ ہوں گے۔
ملتان سے 2 پروازوں کے ذریعے 329 عازم کرام سفر حج کا آغاز کریں گے،سیالکوٹ سے ایک پرواز کے ذریعے 151 عازمین کرام مدینہ منورہ پہنچیں گے۔ کوئٹہ سے پہلی حج پرواز 11 مئی کو روانہ ہو گی،سکھر سے پہلی حج پرواز 27 مئی کو روانہ ہو گی۔
259 حج پروازوں کے ذریعے 68 ہزار سے زائد سرکاری عازمین حج سعودی عرب پہنچیں گے،حج فلائٹ آپریشن 9 جون کو اختتام پذیر ہوگا۔ 20 جون کو پہلی پرواز حجاج کرام کو لے کر وطن واپس پہنچے گی۔
