پاکستان تحریک انصاف (پی ٹی آئی) کی رہنما اور رکن قومی اسمبلی زرتاج گل نے کہا ہے کہ 9 مئی کا دن کیسے منانا ہے، اس بارے میں پارٹی قیادت فیصلہ کرے گی۔
مزید پڑھیں
میڈیا سے گفتگو کرتے ہوئے انہوں نے کہا کہ ہمیں 9 مئی کے حوالے سے بہت تکلیف پہنچائی گئی، پی ٹی آئی رہنماؤں اور کارکنوں کو سزائیں دینا بند کریں، بانی پی ٹی آئی عمران خان کے بغیر ملک نہیں چل سکتا۔
زرتاج گل کا کہنا تھا بانی پی ٹی آئی عمران خان نے ہمیشہ قانون کی حکمرانی کی بات کی۔ پارٹی میں رہنماؤں کی واپسی سے متعلق انہوں نے کہا کہ بانی پی ٹی آئی جس کو چاہیں پارٹی میں واپس لیں، اس کا فیصلہ وہی کریں گے۔
واضح رہے کہ پی ٹی آئی کی رہنما ملیکہ بخاری نے حال ہی میں اپنی پارٹی سے شکوے کا اظہار کرتے ہوئے کہا تھا کہ یہ بدقسمتی ہے کہ پی ٹی آئی کی کور کمیٹی نے ایسے لوگوں کو قبول نہیں کیا جو پارٹی چھوڑ کر نہیں گئے۔
ان کا کہنا تھا کہ ایسے کئی افراد ہیں جنہیں ویڈیو بیانات دینے اور پریس کانفرنسز کرنے کے باوجود پارٹی ٹکٹ دیے گئے اور پارٹی میں اعلیٰ عہدے بھی دیے گئے۔
اس سے قبل سابق وفاقی وزیر اطلاعات فواد چودھری کی پی ٹی آئی میں واپسی کا امکان ظاہر کیا جارہا تھا اور کہا جا رہا تھا کہ بانی چئیرمین پی ٹی آئی کی جانب سے انہیں دوبارہ پارٹی میں شامل کرنے کی اجازت دے دی گئی ہے اور ان کی عمران خان سے جلد ملاقات بھی متوقع ہے۔
