سانحہ 9 مئی پر جہاں پوری قوم غمزدہ ہے وہیں معروف کھلاڑیوں نے بھی اپنے جذبات کا اظہار کرتے ہوئے سانحہ 9 مئی کو افسوسناک قرار دیا ہے۔ سابق ہاکی کپتان صلاح الدین سمیت کرکٹر صہیب مقصود، ایتھلیٹ شجر عباس نے کہا کہ شہدا نے اپنی جانیں سر زمین پاک کے دفاع میں قربان کیں جو ہم پر ان کا احسان ہیں۔ ہیرو میجر ریٹائرڈ نوید الرحمان کا کہنا ہے کہ 9 مئی کو جو ہوا ایسا کام کوئی پاکستانی نہیں کر سکتا۔ شہید کے بارے میں قرآن پاک میں ارشاد ہے کہ شہید کبھی نہیں مرتے وہ ہمیشہ زندہ رہتے ہیں۔
پاکستان ہاکی ٹیم کے سابق کپتان صلاح الدین نے کہا کہ گزشتہ سال 9 مئی کو جس طرح شہدا کی یادگاروں کی بے حرمتی کی گئی وہ انتہائی قابل مذمت ہے، 9 مئی کے روز توڑ پھوڑ میں ملوث عناصر کے خلاف فوری کارروائی کی جائے، شہدا نے اپنی جانیں سرزمین پاکستان کے دفاع میں قربان کیں جو ہم پر ان کا احسان ہے، جو قومیں اپنے محسنوں کی قدر نہیں کرتی وہ تاریخ کی صفحات سے مٹ جاتی ہیں۔ شہدا کے بچے ہمارے لیے یتیم ہوئے، ہمارا فرض ہے کہ ہم شہدا کی قربانیوں کو یاد رکھیں۔
مزید پڑھیں
کرکٹر صہیب مقصود نے کہا کہ شہدائے پاکستان کی تکریم ہم سب پر لازم ہے، پاکستان کی حفاظت ہمیشہ سے پاک فوج کی اوّلین ترجیح رہی ہیں، پاکستان کو درپیش اندرونی اور بیرونی خطرات سے نمٹنے کے لیے پاک فوج ہمیشہ تیار رہتی ہے، ان شہدا کی قربانیوں کی وجہ سے اس ملک میں امن و امان قائم ہے۔
ایتھلیٹ شجر عباس نے کہا کہ شہدا نے اپنی جانیں سرزمین پاکستان کے دفاع میں قربان کیں جو ہم پر ان کا احسان ہے، ہم اپنے شہدا کی تکریم پر کوئی آنچ نہیں آنے دیں گے، ہماری آزادی شہدا کی مرہون منت ہے اور ان کی تکریم ہم پر لازم ہے۔
سانحہ 9 مئی کو ایک سال مکمل ہونے پر چمک آپریشن سیاچن کے ہیرو میجر ریٹائرڈ نوید الرحمان اور ان کی فیملی کا کہنا ہے کہ 9 مئی کو جو حالات ہوئے میں یہ سمجھتا ہوں کہ ایسا کام کوئی پاکستانی نہیں کر سکتا۔ ان ماؤں اور فیملیز کو میرا سلام ہے جنہوں نے اپنے بچے وطن کے لیے قربان کیے۔
ان کا کہنا تھا کہ ہماری فوج دنیا کی وہ واحد فوج ہے جو روزانہ کی بنیاد پر اپنے جوان قربان کر رہی ہے۔ جو قومیں اپنے شہیدوں کی قدر نہیں کرتیں وہ ملک کبھی آگے نہیں بڑھ سکتا۔ مسز میجر ریٹائرڈ نوید الرحمان کا کہنا ہے کہ لوگوں کا فوج کے بارے میں جو منفی نظریہ ہے وہ بہت غلط اور یکطرفہ ہے۔ جب ایک فوجی شہید ہوتا ہے اور اس کی میت وطن کے پرچم میں لپٹی ہوئی گھر آتی ہے تو اس کے خاندان کے جذبات کا اندازا کوئی بھی نہیں لگا سکتا۔ ہم جو آرام سے راتوں کو اپنی نیند پوری کرتے ہیں وہ فوج کی انہی قربانیوں کی بدولت ہے۔
