معروف سیاسی شخصیت اور ٹی وی اینکر مرحوم عامر لیاقت حسین کی تیسری اہلیہ دانیہ شاہ نے عامر لیاقت حسین کی وراثت میں اپنا حصہ لینے کے لیے کروڑوں کا وکیل کرلیا۔
دانیہ شاہ اور عامر لیاقت حسین کی ازدواجی زندگی کے مسائل کسی سے ڈھکے چھپے نہیں تھے، دانیہ شاہ کی جانب سے عامر لیاقت کی متنازع اور نازیبا ویڈیو لیک ہونے کے بعد عامر لیاقت کی زندگی میں طوفان برپا ہوا جس نے انہیں شدید ڈپریشن کا مریض بناکر موت کی نیند سلا دیا۔
عامر لیاقت کی موت کے بعد دانیہ شاہ ان کی وراثت سے اپنا حصہ بھی حاصل کرنا چاہتی تھیں جس کے لیے ایک بار پھر انہوں نے قانون کا دروازہ کھٹکھٹایا۔
سوشل میڈیا پلیٹ فارم ’فیس بک‘ پر ایک ویڈیو زیر گردش ہے جس میں دانیہ شاہ کو اپنے وکیل کے ہمراہ دیکھا جاسکتا ہے۔ دانیہ شاہ کے وکیل نے اپنے ویڈیو بیان میں انکشاف کیا کہ دانیہ نے انہیں وراثت کا کیس لڑنے کے لیے 2 کروڑ روپے دیے ہیں۔
ویڈیو میں وکیل کا کہنا تھا کہ ’سب مجھ سے میرا ذریعہ معاش پوچھتے ہیں تو آج میں بتا دیتا ہوں کہ میں اللہ کے بندوں کی مدد کرتا ہوں جس کے صلے میں اللہ میری مدد کرتا ہے‘۔ انہوں نے بتایا کہ ’عامر لیاقت سے وراثت حاصل کرنے کے لیے دانیہ شاہ نے میری مدد طلب کی جس کے عوض انہوں نے مجھے 2 کروڑ روپے دیے ہیں‘۔
دانیہ شاہ کی جانب سے وکیل کو 2 کروڑ روپے فیس دینے کا سن کر سوشل میڈیا صارفین حیران و پریشان ہوگئے۔ صارفین نے طنزیہ انداز میں دانیہ شاہ کے وکیل کو موسمی وکیل کا لقب دیتے ہوئے عجیب و غریب تبصرے شروع کردیے۔ ایک صارف نے لکھا کہ یہ ایسا وکیل ہے جو بیوہ کو بھی طلاق دلواسکتا ہے۔
