پاکستان تحریک انصاف کے چیئرمین بیرسٹر گوہر خان نے کہا ہے کہ آج سپریم کورٹ نے الیکشن کمیشن اور پشاور ہائیکورٹ کا فیصلہ معطل کردیا ہے۔ ہمیں عدلیہ پر اعتماد ہے، عوامی حقوق کا تحفظ سپریم کورٹ کی ذمہ داری ہے، ہماری عدلیہ سے درخواست ہے دیگر مقدمات کو بھی ایسے ہی سنیں۔
سپریم کورٹ کے باہر میڈیا سے گفتگو میں ان کا کہنا تھا کہ یہ ہماری مخصوص نشستیں تھیں، ہمارے ساتھ غیر آئینی اور غیر قانونی سلوک ہوا تھا۔ ہماری 78 مخصوص نشستیں دیگر جماعتوں کو دی گئیں، ہم یہ کہتے رہے کہ کسی جماعت کو اس کے حق سے زیادہ سیٹیں نہیں مل سکتیں، ان مخصوص نشستوں پر سنی اتحاد کونسل کا حق تھا۔
مزید پڑھیں
چیئرمین پی ٹی آئی نے کہا کہ ہمارے کسی کے ساتھ مذاکرات نہیں ہو رہے ہیں، جس پوائنٹ پر مذاکرات ہوئے سب کو بتائیں گے۔ حکومت مخصوص نشستوں پر آئین میں ترمیم کرنے جا رہی تھی جو اب ناکام ہوگی، سپریم کورٹ نے کہا ہے کہ 78 افراد ووٹ نہیں دے سکتے۔ ہماری مخصوص نشستیں ہمیں ملیں گی ہمیں عدلیہ سے امید ہے کہ مزید انصاف ملے گا۔ الیکشن کمیشن کا آرڈر غیر آئینی تھا، آج کا فیصلہ ہمارے مؤقف کی تائید ہے۔
انہوں نے کہا کہ عدالت نے 78 مخصوص نشستوں پر آنے والوں کو اجنبی قرار دیدیا ہے۔ حکومت آج کے بعد دو تہائی اکثریت سے محروم ہوچکی ہے۔ فارم 47 پر ہماری درخواست چلی آرہی ہے، سپریم کورٹ نے درخواست سنی تو 180 سیٹیں ملیں گی۔ خان صاحب کے مقدمات بھی پینڈنگ ہیں، امید ہے سپریم کورٹ ان پر جلد فیصلہ کرے گی۔
وکیل سلمان اکرم راجا نے بتایا کہ آئین کا حلیہ بگاڑنے والوں کو شکست ہوئی ہے، فتح آئین اور سچائی کی ہوگی۔ جبکہ رہنما پی ٹی آئی کنول شوزب نے کہا کہ دن دیہاڑے ہمارے حقوق پر ڈاکا ڈالا گیا مگر سپریم کورٹ کے فیصلے سے ہمیں بہت خوشی ہوئی ہے، آج مبارک دن ہے ہمارا دل دکھا ہوا تھا۔ چوری شدہ مینڈیٹ پر عدالت کا فیصلہ اچھا لگا۔
