ازبکستان کے وزیر خارجہ بختیار سیدوف 2 روزہ سرکاری دورے پر پاکستان پہنچ گئے ہیں۔
مزید پڑھیں
تفصیلات کے مطابق، وزارت خارجہ میں آمد پر نائب وزیراعظم و وزیر خارجہ اسحاق ڈار نے معزز مہمان کا استقبال کیا اور ان سے ملاقات کی۔
ازبک ہم منصب سے ملاقات میں وزیر خارجہ اسحٰق ڈار نے کہا کہ دونوں ملکوں کے درمیان مضبوط دوستانہ تعلقات ہیں، پاکستان ازبکستان کے ساتھ تجارت، اقتصادی میدان سمیت مختلف شعبوں میں تعلقات کو بڑھانا چاہتا ہے۔
اس موقع پر ازبک وزیر خارجہ بختیار سیدوف نے کہا کہ پاکستان آ کر بہت خوشی ہوئی، پاکستان ہمارے لیے اپنے دوسرے گھر کی مانند ہے، پاکستان کے ساتھ تعلقات کو بہت اہمیت دیتے ہیں۔
دفتر خارجہ کے حکام کا کہنا ہے کہ وزیر خارجہ و نائب وزیراعظم اسحاق ڈار اور ان کے ازبک ہم منصب کے درمیان باضابطہ مذاکرات ہوں گے جن میں دوطرفہ اقتصادی و تجارتی تعلقات کو مزید فروغ دینے پر خصوصی توجہ مرکوز رہے گی۔
ازبک وزیر خارجہ پاکستان میں قیام کے دوران وزیراعظم شہباز شریف اور دیگر اہم رہنماؤں سے بھی ملاقات کریں گے۔
