زہریلے اور جان لیوا دھوئیں کے خلاف کارروائی کرتے ہوئے پنجاب حکومت نے فصل کی باقیات جلانے پر مقدمہ درج کرکے حافظ آباد سے 2 افراد کو گرفتار کرلیا ہے، جن کے اس ماحول مخالف عمل سے دھوئیں کے نتیجے میں موٹر وے پر حادثہ بھی رونما ہوا تھا۔
مزید پڑھیں
فصل کی باقیات جلانے سے حادثات کی رپورٹس پر پنجاب حکومت نے سخت کارروائی کا دائرہ وسیع کرتے ہوئے انتظامیہ اور پولیس کو زیرو ٹالرنس کی ہدایات جاری کرتے ہوئے صوبہ بھر میں اسسٹنٹ کمشنرز اورنمبرداروں کو فصلوں کی باقیات جلانے کی روک تھام کا ٹاسک دے دیاگیا ہے۔
کسی بھی علاقے میں فصل کی باقیات جلائی گئیں تو ضلعی انتظامیہ اور نمبردار ذمہ دار ہوں گے، پولیس کے مطابق حافظ آباد میں گرفتار ہونیوالے 2 افراد کی جانب سے فصل کی باقیات کو آگ لگانے سے پیدا ہونے والے دھوئیں کے نتیجے میں موٹر وے پر حادثہ ہوا جس پر قانونی کاروائی کی گئی ہے۔
وزیراعلیٰ پنجاب مریم نواز نے اس ضمن میں ضلعی انتظامیہ کو ہدایت جاری کی ہیں کہ جہاں خلاف ورزی ہو وہاں سخت ترین کارروائی کی جائے، ماحولیاتی بہتری اور اسموگ کے خاتمے کے لئے قانون کی خلاف ورزی پر ایف آئی آردرج ہوگی۔
سینئر وزیرپنجاب مریم اورنگزیب نے ایک بیان میں بتایاکہ پنجاب حکومت نے قانونی کارروائی حالیہ سروے کے نتائج پر کی ہے، انہوں نے ہدایت کی کہ ضلعی انتظامیہ اور نمبردار اپنے اپنے علاقوں میں مساجد سے اعلان کرائیں کہکسان فصل کی باقیات نہ جلائیں۔
’ڈپٹی کمشنرز علاقہ نمبرداروں کو اعتماد می لیں، کسانوں کو فصل کی باقیات جلانے کے نقصانات اور قانون کے بارے میں آگاہ کریں، اسموگ اور زہریلا دھواں موت کاسبب بننے والے امراض پیدا کرتا ہے، میڈیا اور عام شہری زہریلے دھوئیں پر قابو پانے کے لئے اپنا کردار ادا کریں۔‘
