کرکٹ آسٹریلیا نے رواں برس نومبر میں آسٹریلیا پاکستان وائٹ بال سیریز کے لیے پاکستان فین زونز بنانے کا اعلان کیا ہے۔
یہ پیش رفت کرکٹ آسٹریلیا کے کثیرالثقافتی ایکشن پلان کا حصہ ہے، جس کا مقصد شمولیت کو فروغ دینا اور متنوع پس منظر سے تعلق رکھنے والے کرکٹ شائقین کے لیے ایک بھرپور تجربہ فراہم کرنا ہے۔
کرکٹ آسٹریلیا کے مطابق پاکستان کے خلاف ون ڈے انٹرنیشنل اور ٹی 20 سیریز کے لیے ایک مخصوص اسٹینڈ کو پاکستان فین زون کا نام دیا گیا ہے، اس کے علاوہ اسٹیڈیم میں نماز کی جگہ اور حلال فوڈ کے پاس ایک اسٹینڈ کو پاکستان فینز زون کا درجہ بھی دیا گیا ہے۔
پاکستان اور آسٹریلیا کی کرکٹ ٹیموں کے مابین 6 وائٹ بال میچوں پر مشتمل سیریز رواں برس نومبر میں کھیلی جائے گی، جس کے دوران 6 مختلف اسٹیڈیم پر اسٹینڈز کو پاکستان فین زونز کا درجہ دیا جائے گا۔
پاکستانی شائقینِ کرکٹ کے آرام دہ اور خوشگوار تجربہ کو یقینی بنانے کے لیے، کرکٹ آسٹریلیا نے ہر اسٹیڈیم میں پاکستانی شائقین کے لیے مخصوص بیٹھنے کی جگہیں مختص کی ہیں، یہ زون ثقافتی ضروریات کو پورا کرتے ہوئے نماز کے مقامات اور حلال کھانے کا انتخاب کریں گے۔
واضح رہے کہ کرکٹ آسٹریلیا کا یہ فیصلہ بارڈر-گواسکر ٹرافی کے لیے انڈیا کے فین زونز کے پہلے اعلان کی عکاسی کرتا ہے، جس میں مخصوص نشست، نیلے رنگ کے لباس پہننے کی حوصلہ افزائی، اور ماحول کو روایتی شور شرابے سے ایک پرجوش میں تبدیل کرنیوالے آلات کو لانا شامل ہیں۔
پاکستان اور انڈیا دونوں فین زونز کے لیے ٹکٹوں کی فروخت کے بارے میں تفصیلات اگلے ہفتے جاری کی جائیں گی، جو آسٹریلیا میں مردوں کی کرکٹ کے بین الاقوامی موسم گرما کے لیے ایک جامع اور سنسنی خیز آغاز کا پتا دیتی ہے۔
26 مارچ کو کرکٹ آسٹریلیا نے اس سال نومبر میں پاکستان کے خلاف ون ڈے اور ٹی ٹوئنٹی سیریز کے شیڈول کا اعلان کیا۔
تین میچوں کی ون ڈے سیریز کا آغاز 4 نومبر کو میلبورن کرکٹ گراؤنڈ میں ہوگا، اس کے بعد بالترتیب 8 اور 10 نومبر کو ایڈیلیڈ اور پرتھ میں میچز ہوں گے۔ پاکستان نے آخری بار آسٹریلیا میں ون ڈے سیریز 2016 میں کھیلی تھی۔
ون ڈے کے بعد پاکستان اور آسٹریلیا کے درمیان تین ٹی ٹوئنٹی میچوں کی سیریز بھی کھیلی جائے گی۔ پاکستان نے آخری بار 2022 میں آسٹریلیا میں آئی سی سی مینز T20 ورلڈ کپ فائنل کھیلا تھا۔
