فلمساز کرن راؤ جو ’لاپتا لیڈیز‘ کی کامیابی سے لطف اندوز ہو رہی ہیں، انہوں نے حال ہی میں تمام ہدایت کاروں کو مشورہ دیا ہے کہ اچھی کہانی کے علاوہ، آپ کو ایسی تخلیق کرنا ہوگی جو سامعین کے دل چُھو لے۔ ایک اچھی کہانی وہ ہوتی ہے جس سے آپ جڑ جاتے ہیں، جس کے بارے میں بات کرنا آپ کو دلچسپ لگتا ہے۔ مطلب یہ کہ وہ فلم پہلے آپ کو پسند آنی چاہیے۔
’لاپتا لیڈیز‘ کی کامیابی پر منائی گئی تقریب سے خطاب کرتے ہوئے کرن راؤ نے کہا کہ میں ہمیشہ محسوس کرتی ہوں کہ کچھ فلمیں ایسی ہوتی ہیں جو اچھی کارکردگی کا مظاہرہ کرتی ہیں اور کچھ اس سے بالکل مختلف ہوتی ہیں۔ شائقین فلم کے پاس اب بہت سے آپشنز ہیں، ان کے لیے مختلف قسم کے مواد تک رسائی آسان ہو گئی ہے۔
مزید پڑھیں
کرن راؤ کا کہنا تھا کہ ایک فلمساز کے طور پر میں محسوس کرتی ہوں کہ آپ کو اپنے پیشے میں سرفہرست رہنے کی ضرورت ہے۔ اگر آپ دلچسپ کہانیاں تخلیق کرنے میں اچھے ہیں تو آپ ایک اچھے کہانی کار بنیں گے۔ چاہے آپ او ٹی ٹی پلیٹ فارم کے لیے کام کر رہے ہوں یا فلم بنا رہے ہوں۔
’لاپتا لیڈیز‘ کے لیے عامر خان کی تعریف کرتے ہوئے کرن راؤ نے کہا کہ صرف عامر خان جیسا فلمساز ہی ایسی فلم بنا سکتا تھا۔ عامر خان نے محسوس کیا تھا کہ یہ فلم عام اداکاروں کے ساتھ بہترین لگے گی۔عامر ہی وہ شخص ہیں جنہوں نے کہانی ڈھونڈھی، ان کے بغیر فلم نہیں بن سکتی تھی۔
واضح رہے کہ پرتیبھا رانتا، نیتانشی گوئل، سپارش سریواستو، روی کشن نے ’لاپتا لیڈیز‘ میں مرکزی کردار ادا کیے ہیں، فلم یکم مارچ 2024 کو ریلیز ہوئی تھی اور تاحال سنیما گھروں کی زینت بنی ہوئی ہے۔