خیبرپختونخوا حکومت خوامخواہ محاذ آرائی پر تلی ہوئی ہے، وفاقی وزیر اطلاعات

وفاقی حکومت نے خیبر پختونخوا حکومت کے وزیر خوراک ظاہر طورو کے وزیراعظم سے منسوب بیان کو ذہنی اختراع اور خلاف حقیقت قرار دیا ہے۔ وفاقی وزیر اطلاعات عطا اللہ تارڑ  کے مطابق وزیراعظم سے جھوٹ منسوب کرکے خیبر پختونخوا حکومت اپنی ساکھ بنانے کی ناکام کوشش کر رہی ہے۔

سیاسی آگ بھڑکانے کی کوشش کی جا رہی ہے

انہوں نے کہا کہ خیبرپختونخوا حکومت خوامخواہ محاذ آرائی پر تلی ہوئی ہے۔ انہوں نے کہا کہ بجلی، گندم، محاصل کے حوالے سے مسلسل جھوٹ بول کر سیاسی آگ بھڑکانے کی کوشش کی جا رہی ہے۔

وفاقی وزیر نے کہا کہ کبھی وزیراعلیٰ خیبر پختونخوا اسلام آباد پر حملے تو کبھی پیسکو پر قبضے اور وفاقی حکومت کو 15 دن کی ڈیڈ لائن کی دھمکیاں دے رہے ہیں۔

محاذ آرائی کی کوشش ناکام ہوگی

انہوں نے کہا کہ خیبر پختونخوا حکومت کی محاذ آرائی کی کوشش ناکام ہوگی۔ انہوں نے کہا کہ سرکاری املاک، اپنے اداروں اور محکموں کا دفاع کرنا جانتے ہیں۔ کوئی کسی بھول میں نہ رہے، کسی کو قانون ہاتھ میں نہیں لینے دیں گے۔ خلاف ورزی کرنے والوں کے خلاف سخت ایکشن ہوگا۔

انہوں نے کہا کہ وفاقی حکومت سیاسی اختلافات سے بالاتر ہوکر آئین اور قانون کے مطابق خیبرپختونخوا کے عوام کے حقوق اور وسائل کی فراہمی میں اپنا بھرپور کردار ادا کرتی رہے گی۔