گندم خریداری میں عوام کے ساتھ ظلم کیا گیا، گورنر خیبرپختونخوا

گورنر خیبرپختونخوا فیصل کریم کنڈی نے کہا ہے کہ گندم کی خریداری میں عوام کے ساتھ ظلم کیا گیا، گورنر کے پاس کوئی سمری نہیں آئی، سپریم کورٹ میں غلط بیانی کی گئی۔

گورنر خیبرپختونخوا فیصل کریم کنڈی نے ڈسٹرکٹ بار ڈیرہ اسمعیل خان میں میڈیا سے گفتگو کرتے ہوئے کہا کہ وزیراعلیٰ کی گرڈ اسٹیشن پر چڑھائی سے مسائل حل نہیں ہوں گے، علی امین گنڈاپور نے پہلے تربیلا سے بجلی بند کرنے کا اعلان بھی کیا تھا۔

’بجلی سپلائی کا معاملہ سیاسی ہے، اسلام آباد میں بیٹھ کر مسئلے کا حل نکالا جاسکتا ہے۔‘

فیصل کریم کنڈی نے کہا کہ مسائل کا آسان حل یہ ہے کہ تمام ڈسکوز کا اختیار صوبائی حکومت کو دے دیا جائے، جب مرضی ہو بٹن آن یا آف کرے، بجلی بلوں کی ریکوری بھی صوبائی حکومت خود کرے۔

گورنر خیبرپختونخوا نے کہا کہ صوبے کے 70 فیصد وزرا کرپشن میں ملوث ہیں، گندم کی خریداری میں عوام کے ساتھ ظلم کیا گیا، وزیراعلیٰ علی امین گنڈاپور کے آبائی علاقے کلاچی میں امن و امان خراب ہے۔

انہوں نے کہا کہ گورنر کے پاس کوئی سمری نہیں آئی، سپریم کورٹ میں غلط بیانی کی گئی۔

ان کا کہنا تھا کہ قومی کرکٹ ٹیم میں آدھے کھلاڑی خیبرپختونخوا کے ہیں، جس پر مجھے فخر ہے۔