وفاق سے پہلے صوبائی بجٹ پیش کرنے والے عوام کو بیوقوف بنا رہے ہیں، وزیر اطلاعات عطا تارڑ

وفاقی وزیر اطلاعات عطا تارڑ نے کہا کہ خیبر پختونخوا کی حکومت کل بجٹ پیش کرنے جا رہی ہے، تاریخ میں کبھی ایسا نہیں ہوا کہ وفاقی حکومت سے پہلے صوبائی حکومتیں اپنا بجٹ پیش کریں، یہ وفاقی حکومت کے بجٹ تخمینہ کا خود تعین کرنے چلے ہیں۔ خیبرپختونخوا حکومت کا یہ اقدام قوم کو بے وقوف بنانے کے مترادف ہے۔

ایس آئی ایف سی پاکستان کی لائف لائن ہے، عطا تارڑ

وزیر اطلاعات کا کہنا تھا کہ پاکستان اور یو اے ای کی آئی ٹی کمپنیوں کے درمیان معاہدوں پر دستخط ہوئے، ہم جہاں جاتے ہیں سرمایہ کاری اور تجارت کی بات کرتے ہیں۔ ایران کے مرحوم صدر نے بھی پاکستان سے تجارت و سرمایہ کاری بڑھانے کی بات کی تھی، مرکزی بینک کے اعداد و شمار کے مطابق برآمدات میں اضافہ ہو رہا ہے۔ دوست ممالک کا پاکستان پر اعتماد بڑھا ہے۔

’مخالفین پاکستان کی معیشت کو ڈبونے کے لیے جو حرکات و سکنات کر رہے ہیں، وہ پوری قوم دیکھ رہی ہے‘۔

عطا تارڑ نے کہا کہ ایک طرف تو دوست ممالک کا پاکستان میں سرمایہ کاری کے لیے اعتماد بحال ہورہا ہے اور دوسری طرف مخالفین نے سوشل میڈیا پر ایس آئی ایف سی کے خلاف پراپیگینڈا شروع کردیا ہے، جنہوں نے ملک کو تباہ کیا اب وہ ایس آئی ایف سی کے درپے ہیں۔