انگلش کپتان جوس بٹلر پاکستان کے خلاف تیسرے ٹی20 میچ سے باہر

پاکستان کے خلاف دوسرے ٹی20 میچ میں شاندار بیٹنگ کرنے کا مظاہرہ کرنے والے انگلش کپتان جوس بٹلر پاکستان کے خلاف کل ہونے والے تیسرے ٹی20 میچ سے باہر ہوگئے ہیں۔

میڈیا رپورٹس کے مطابق جوس بٹلر کے ہاں تیسرے بچے کی پیدائش ہونے والی ہے جس کی وجہ سے وہ پاکستان کے خلاف تیسرے ٹی20 میچ میں شرکت نہیں کر سکیں گے۔

جوس بٹلر کی جگہ معین علی انگلش ٹیم کی کپتانی کریں گے۔ میڈیا رپورٹس کے مطابق یہ بتانا ابھی قبل از وقت ہے کہ جوس بٹلر پاکستان کے خلاف سیریز کا چوتھا اور آخری میچ کھیلیں گے یا نہیں تاہم وہ آئی سی سی ٹی20 ورلڈ کپ کے لیے ٹیم کے ساتھ شیڈول کے مطابق سفر کریں گے۔

واضح رہے کہ 4 میچوں کی ٹی20 سیریز میں انگلینڈ کو ایک صفر کی برتری حاصل ہے۔ دونوں ٹیموں کے درمیان پہلا ٹی 20 میچ بارش کی نذر ہو گیا تھا جبکہ دوسرے میچ میں انگلینڈ نے پاکستان کو شکست دی تھی۔

پاکستان اور انگلینڈ کی ٹیموں کے مابین سیریز کا تیسرا میچ کل کارڈف میں کھیلا جائے گا جبکہ چوتھا اور آخری ٹی20 میچ 30 مئی کو دی اوول میں کھیلا جائے گا۔