آئندہ بجٹ میں عوام کو ریلیف دینے کی حکمت عملی ترتیب دینے کے لیے مسلم لیگ ن کے رہنما سرجوڑ کر بیٹھ گئے ہیں۔
آئندہ مالی سال کے بجٹ میں عوام کو ریلیف دینے کے حوالے سے مسلم لیگ ن کا اہم اجلاس پارٹی صدر میاں محمد نواز شریف کی زیرصدارت جاتی امرا، رائیونڈ میں ہوا۔
مزید پڑھیں
مسلم لیگ ن کے ذرائع کے مطابق میاں نواز شریف کی زیر صدارت پارٹی کے 3 گھنٹے طویل مشاورتی اجلاس میں آئندہ مالی سال کے بجٹ میں عوام کو ہرممکن ریلیف دینے کے لیے تجاویز پر تبادلہ خیال ہوا اور پارٹی کے سینئر رہنماؤں سے اس حوالے سے تجاویز لی گئیں۔
اجلاس میں شرکت کرنے والے وفاقی وزرا اور سیکرٹریز نے اپنے اپنے محکموں کی جانب سے تجاویز پیش کیں، پارٹی قائدین نے بھی عوامی مشاورت سے ممکنہ ریلیف کے بارے میں اپنی اپنی تجاویز دیں۔
اجلاس میں وزیراعلیٰ پنجاب مریم نواز نے اپنی صوبائی حکومت کی جانب سے عوام کو بھرپور ریلیف فراہم کرنے کے اقدامات تجویز کیے، نواز شریف نے بجٹ مشاورتی اجلاس میں اپنے وسیع تر سیاسی و انتظامی تجربے کی بنیاد پر اہم ہدایات بھی جاری کیں۔
اجلاس میں نائب وزیراعظم اسحاق ڈار اور وفاقی وزرا ڈاکٹر مصدق ملک، اویس لغاری، رانا تنویر حسین، عطا اللہ تارڑ، جام کمال، رانا تنویر حسین، وزیراعلیٰ پنجاب مریم نواز، سینئر رہنما سینیٹر پرویز رشید اور دیگر سینیئر رہنما شریک ہوئے، وفاقی و صوبائی محکموں کے مختلف سیکرٹریز بھی اجلاس میں شریک ہوئے۔
