وفاقی وزیر داخلہ و چیئرمین پاکستان کرکٹ بورڈ محسن نقوی نے کہا ہے کہ قومی ٹیم کے کھلاڑی پراعتماد ہیں اور یقینا اچھا پرفارم کریں گے، ہر پاکستانی کو یہ انہیں یہ بتانا ہے کہ ہار جیت سے قطع نظر وہ اپنی ٹیم کے ساتھ ہیں۔
مزید پڑھیں
پاکستان ہاؤس میں پاکستانی ہائی کمشنر ڈاکٹر محمد فیصل کی جانب سے قومی کرکٹ ٹیم کے اعزاز میں منعقدہ تقریب سے خطاب کرتے ہوئے محسن نقوی کا کہنا تھا کہ کرکٹ ٹیم 100 فیصد کارکردگی پیش کرے اور گھبرا کر نہ کھیلیں۔’اس اپروچ کے ساتھ کھلاڑی یقینا امریکا سے ورلڈ کپ جیت کر وطن لوٹیں گے۔‘
چیئرمین پی سی بی محسن نقوی کا کہنا تھا کہ وہ ورلڈ کپ پاکستان میں آتا دیکھ رہے ہیں، یہ وقت قومی ٹیم کی حمایت کا ہے اور ٹیم نے ورلڈ کپ سے متعلق اپنی تیاری مکمل کرلی ہے۔ ’ٹیم کو کہتا ہوں گھبرانا اور ڈرنا بالکل نہیں ہے ہار جیت تو کھیل کا حصہ ہے۔‘
میئر لندن صادق خان، پاکستان میں برطانوی ہائی کمشنر جین میریٹ، سینیٹر انوارالحق کاکڑ، وزیر اعلیٰ بلوچستان سرفراز بگٹی اور برطانیہ میں مقیم پاکستانیوں کی بڑی تعداد نے تقریب میں شرکت کی، جہاں وفاقی وزیرداخلہ محسن نقوی مہمان خصوصی تھے۔
میئر لندن صادق خان سے ملاقات
اس موقع پر وزیرداخلہ محسن نقوی سے لندن کے میئر صادق خان نے ملاقات میں باہمی دلچسپی کے امور اور سیاسی صورتحال پر تبادلہ خیال کیا، ترجمان وزارت داخلہ کے مطابق ملاقات میں کرکٹ کے حوالے سے خاص طور پر گفتگو ہوئی۔
محسن نقوی نے مئیر لندن صادق خان کو پاکستان کے دورے کی دعوت دی، برطانیہ میں تعینات پاکستانی ہائی کمشنر ڈاکٹر محمد فیصل اور پاکستان میں تعینات برطانوی ہائی کمشنر جین میریٹ بھی اس موقع پر موجود تھیں۔
