سوشل میڈیا پلیٹ فارم ٹوئٹر کی سبسکرپشن سروس کو 24 مارچ 2023 سے پاکستان سمیت دنیا بھر میں متعارف کرا دیا گیا ہے۔ اب پاکستانی صارف بھی پیسوں کے عوض ٹوئٹر اکاؤنٹ پر بلیو ٹک حاصل کر سکتے ہیں۔
پاکستان میں سوشل میڈیا ویب سائیٹ ٹوئٹر کے صارف 2250 روپے ماہانہ ادا کرکے ٹوئٹر بلیو ٹک صارف بن سکتے ہیں۔ سالانہ فیس یکمشت ادا کرنے پر ٹوئٹر کی جانب سے رعایت بھی دی جائے گی۔
ٹوئٹر بلیو ٹک کے آئیکون پر کلک کرنے پر بتایا جاتا ہے کہ اس سبسکرپشن سروس کا حصہ بننے پر بلیو چیک مارک، طویل ویڈیوز کو پوسٹ کرنے، نئے فیچرز تک سب سے پہلے رسائی، ٹوئٹ کو ایڈٹ کرنے، این ایف ٹی پروفائل پکچرز اور 1080 میگا پکسل ویڈیو اپ لوڈ سمیت دیگر سہولیات صارفین کو دستیاب ہوں گی۔
Twitter Verified now available worldwide! https://t.co/SxUhUWJbmR
— Elon Musk (@elonmusk) March 23, 2023
ماہانہ اور سالانہ فیس کا پلان بھی دیکھا جا سکتا ہے اور اس کے نیچے سبسکرپشن کا بٹن دیا گیا ہے۔ ایلون مسک نے ٹوئٹر خریدنے کے بعد نومبر 2022 کے شروع میں ٹوئٹر بلیو سروس متعارف کرائی تھی مگر سبسکرپشن پلان متعارف کرانے کے بعد معروف شخصیات اور اداروں کے ناموں کے جعلی مصدقہ اکاؤنٹس کی بھرمار ہوگئی تھی جس کے بعد اسے معطل کردیا گیا۔ پھر 12 دسمبر 2022 کو اسے کچھ تبدیلیوں کے ساتھ دوبارہ پیش کیا گیا تھا۔
