بالی ووڈ ادکارہ ملائکہ اروڑا اور اداکار ارجن کپور کی ایک سال سے زیرِ گردش علیحدگی کی خبروں کے حوالے سے آخر کار سچ سامنے آگیا، دونوں نے باہمی رضا مندی سے علیحدگی اختیار کرلی۔
بھارتی میڈیا رپورٹس کے مطابق اس خبر کی تصدیق مختلف ذرائع نے کی ہے کہ ارجن کپور اور ملائکہ اروڑا نے ایک دوسرے کی عزت اور باہمی رضامندی کے ساتھ راہیں جدا کرنے کا فیصلہ لے لیا ہے۔ پنک ویلا کی رپورٹ کے مطابق ان کے رشتے کی مدت پوری ہوچکی ہے اور وہ اس معاملے کو مہذب انداز میں ڈیل کریں گے۔
ملائکہ اروڑا اور ارجن کپور کے درمیان بہت گہرا تعلق تھا اور علیحدگی کے بعد بھی دونوں کے دلوں میں ایک دوسرے کا خاص مقام رہے گا، دونوں راہیں جدا کرنے کا فیصلہ کرچکے ہیں اور اس معاملے پر تہذیب کے دائرے میں رہتے ہوئے خاموشی اختیار کریں گے اور کسی بھی شخص کو ان کے ذاتی معاملے پر بات کرنے کی اجازت نہیں دیں گے۔
دونوں کے درمیان راہیں جدا کرنے کاہرگز مقصد یہ نہیں کہ ان کے درمیان کوئی لڑائی جھگڑا ہوا ہے، وہ تاحال ایک دوسرے کا احترام کرتے ہیں اور ہمیشہ ایک دوسرے کی ہمت بنے رہیں گے۔
رپورٹ میں یہ بھی بتایا گیا کہ ملائکہ اروڑا اور ارجن کپور کی میڈیا چینلز اور مداحوں سے درخواست ہے کہ وہ ان کی پرائیویسی کا خیال رکھیں اور انہیں ان جذباتی لمحات کو پُرسکون انداز میں گزارنے دیں۔
