پی ٹی آئی مجیب الرحمان سے متعلق ٹویٹ سے پیچھے ہٹنے کی کوشش کررہی ہے، خواجہ آصف

وزیر دفاع خواجہ آصف نے کہا ہے کہ پاکستان تحریک انصاف (پی ٹی آئی) مجیب الرحمان سے متعلق ٹویٹ سے پیچھے ہٹنے کی کوشش کی کررہی ہے۔

جیو نیوز سے گفتگو کرتے ہوئے وزیر دفاع خواجہ آصف نے کہا کہ چیئرمین پی ٹی آئی بیرسٹر گوہر نے وضاحت دی ہے کہ سوشل میڈیا ٹیم نے ٹویٹ سے پہلے اجازت نہیں لی تھی۔

انہوں نے کہا کہ یہ پہلی مرتبہ ہے کہ پی ٹی آئی کو اپنے ’ایکس‘ اکاؤنٹ پر کی گئی پوسٹ سے پیچھے ہٹنا پڑا۔ انہوں نے کہا وہ مجیب الرحمان اور سانحہ مشرقی پاکستان کی تاریخ پر ایک الگ مؤقف رکھتے ہیں۔

’کشیدگی کم کرنی ہے تو عمران خان منہ بند رکھیں‘

خواجہ آصف نے کہا کہ سانحہ مشرقی پاکستان کو آج بڑھاوا دے کر آپ کشیدگی بڑھانا چاہتے ہیں، اگر کشیدگی کم کرنی ہے تو بانی پی ٹی آئی عمران خان کو منہ بند رکھنا چاہیے۔

انہوں نے کہا کہ لگتا ہے کہ بانی پی ٹی آئی کشیدگی کو بڑھانا چاہتے ہیں اور وہ دوبارہ 9 مئی جیسی کوشش کررہے ہیں۔

خواجہ آصف نے کہا کہ مسلم لیگ ن کے قائد نواز شریف نے بنی گالا میں سڑک بنوائی مگر بانی پی ٹی آئی اس سے مکر گئے، سیاست یا کھیل میں جس نے ان سے اچھائی کی سب کو انہوں نے ڈنگ مارا۔

وزیر دفاع نے کہا کہ جنرل باجوہ باپ، جنرل فیض ان کا چچا ہوتا تھا، اب سارا ملبہ انہی پر ڈال رہے ہیں۔