متنازع پوسٹ کا معاملہ: پی ٹی آئی نے ایف آئی اے طلبی کے نوٹسز اسلام آباد ہائیکورٹ میں چیلنج کردیے

پاکستان تحریک انصاف (پی ٹی آئی) کی قیادت نے سوشل میڈیا پر متنازع پوسٹ کے حوالے سے کمپلینٹ اور ایف آئی اے کے طلبی کے نوٹسز کو اسلام آباد ہائیکورٹ میں چیلنج کردیا۔ چیئرمین پی ٹی آئی گوہر خان، سیکرٹری اطلاعات رؤف حسن نے اسلام آباد ہائیکورٹ میں درخواست دائر کی۔

دائر کردہ درخواست میں موقف اپنایا گیا کہ بانی پی ٹی آئی عمران خان کے ایکس اکاؤنٹس سے ہونے والی پوسٹ کا مقصد پاکستان کے لیے یکجا ہونے کا درس دینا تھا، اس کا مقصد ملک کو بحران سے نکالنے کے لیے نیشنل ڈائیلاگ کے اہتمام کی ترغیب دینا تھا۔

بانی پی ٹی آئی کے ایکس اکاؤنٹ سے ہونے والی پوسٹ کو سیاسی مخالفین نے توڑ مروڑ کر پیش کیا، یکدم سرکاری مشینری حرکت میں آتی ہے اور ایف آئی اے کے ڈپٹی ڈائریکٹر کی جانب سے کمپلینٹ فائل کر دی جاتی ہے۔

درخواست کے مطابق کمپلینٹ میں کہا جاتا ہے کہ پوسٹ سے مسلح افواج کے جوانوں کو بغاوت پر اکسایا گیا ہے، ڈپٹی ڈائریکٹر کی کمپلینٹ ایک کمپلینٹ نہیں، بلکہ ٹرائل کے بغیر فیصلہ معلوم ہوتا ہے۔

تفتیشی افسر کی جانب سے 31 مئی کو درخواست گزاران کو طلبی کے نوٹس جاری کیے گئے، اس کمپلینٹ اور طلبی کے نوٹسز کا مقصد درخواست گزران کو ہراساں کرنا ہے۔

درخواست میں استدعا کی گئی کہ عدالت کمپلینٹ اور طلبی کے نوٹسز کو کالعدم قرار دے اور درخواست کے زیر سماعت ہونے تک فریقین کو درخواست گزاران کو گرفتار کرنے یا ہراساں کرنے سے روکا جائے۔

واضح رہے درخواست میں سیکٹری داخلہ، شکایت کنندہ ڈپٹی ڈائریکٹر ایف آئی اے اور تفتیشی افسر کو فریق بنایا گیا ہے۔