کاروباری مقدمے میں مجرم قرار دیے جانے پر امریکا کے سابق صدر ڈونلڈ ٹرمپ نے اپنے ردعمل میں کہا ہے کہ وہ معصوم ہیں اور ملک کے لیے لڑرہے ہیں، ان کے خلاف فیصلہ ایسے جج نے دیا جو متنازعہ اور بدعنوان ہیں۔
مزید پڑھیں
سابق امریکی صدر ڈونلڈ ٹرمپ کو کاروباری ریکارڈ میں جعلسازی کے مقدمے میں مجرم ٹھیرا دیا گیا ہے، نیویارک کی عدالت میں 12 رکنی جیوری نے ’ہش منی‘ کیس کی 5 ہفتے تک چلنے والی سماعت مکمل کرتے ہوئے انہیں قصوروار قرار دیا۔
’بائیڈن انتظامیہ نے ایسا اس لیے کیا کہ سیاسی مخالف کو نقصان پہنچایا جاسکے‘
عدالت کی جانب سے قصوروار دیے جانے پر سابق امریکی صدر نے اپنے ردعمل میں کہا ہے کہ وہ معصوم ہیں، وہ ملک اور ملک کے آئین کے لیے لڑرہے ہیں۔
ڈونلڈ ٹرمپ نے کہا ’ہمارے پورے ملک میں اس وقت دھاندلی ہورہی ہے، بائیڈن انتظامیہ نے ایسا اس لیے کیا کہ سیاسی مخالف کو نقصان پہنچایا جاسکے، مجھے لگتا ہے کہ یہ شرم کی بات ہے۔‘
انہوں نے کہا نیویارک کے علاقے مین ہیٹن کی عدالت میں 12 رکنی جیوری نے ’ہش منی‘ کیس کی 5 ہفتے تک جاری رہنے والی سماعت ختم ہونے کے بعد قصور وار قرار دیا۔
ٹرمپ نے کہا کہ ہمارا ملک جہنم بن چکا ہے، یہ ایک شرمناک بات ہے، یہ ایک متنازعہ جج کی جانب سے دھاندلی زدہ ٹرائل تھا، جو بدعنوان ہیں۔
ان کا کہنا ہے کہ وہ لڑتے رہیں گے اور جیتیں گے، اصل فیصلہ 5 نومبر کو عوام کریں گے، میں بہت معصوم آدمی ہوں، سب جانتے ہیں کہ یہاں کیا ہوا۔
