معروف فلم ڈائریکٹر سید نور نے حال ہی میں فلم ’تیرے باجرے دی راکھی‘ کی ہدایت کاری کی تھی جس میں صائمہ نور اور جنت مرزا نے اداکاری کی تھی۔ یہ فلم بری طرح فلاپ ہوئی اور ٹک ٹاکر جنت مرزا ایک کامیاب فلمی اداکارہ نہ بن سکیں جو ناظرین کو سینما کی طرف کھینچ سکیں۔ سید نور نے ایک انٹرویو میں انکشاف کیا ہے کہ جنت مرزا بطور فلم اسٹار اپنی پہچان کیوں نہیں بناسکیں۔
سید نور نے کہا کہ جنت بہت تعلیم یافتہ لڑکی ہے، اس کا تعلق ایک بہت ہی تعلیم یافتہ اور خوشحال گھرانے سے ہے۔ انہیں فلم اسٹار بننے کا شوق نہیں تھا، وہ جانتی تھیں کہ وہ ایک ماہر ٹک ٹاکر ہیں، یہی وجہ ہے کہ فلم کی ناکامی نے ان پر کوئی اثر نہیں ڈالا۔
مزید پڑھیں
ان کا کہنا تھا کہ میں نے جنت مرزا کو اس لیے فلم میں لیا کیونکہ میرے اس کی فیملی کے ساتھ بہت اچھے تعلقات ہیں اور میں اسے پسند کرتا ہوں۔ ہم نے اسے ظاہری لباس پہننے یا بولڈ مناظر فلمانے پر بھی مجبور نہیں کیا۔ ہم نے انہیں اس لیے سائن کیا کیونکہ ہم چاہتے تھے کہ ان کے فالوورز آئیں اور فلم دیکھیں لیکن ہمایوں سعید صحیح تھے، لوگ نہیں آئے۔
سید نور کا مزید کہنا تھا کہ ایسا اس لیے ہوا کیونکہ عام طور پر لوگ ٹک ٹاک مفت میں دیکھتے ہیں۔ جنت نے پہلے ہی اپنی زندگی میں بہت سی کامیابیاں حاصل کی ہیں، ان کے فالوورز ان سے مطمئن ہو رہے تھے۔
یاد رہے کہ سید نور ایک کامیاب فلم ڈائریکٹر ہیں اور بنیادی طور پر 90 کی دہائی میں بیک ٹو بیک ہٹ فلمیں بنانے کے لیے مشہور ہیں۔ ان کی اب تک کی سب سے مقبول فلم چوڑیاں ہے۔ ان کی فلم مجاجن بھی مقبول ہوئی تھی۔
انہوں نے کئی فلمی ستاروں کو متعارف کرایا جنہوں نے فلم انڈسٹری پر راج کیا۔ فلم اسٹار صائمہ، سید نور کی اہلیہ ہیں، اس سے قبل ان کی شادی رخسانہ نور سے ہوئی تھی جن کا چند برس قبل انتقال ہوگیا تھا۔
