گزشتہ برس اے آر وائی ڈیجیٹل پر نشر ہونیوالی مشہور ٹی وی سیریل ’بے بی باجی‘ کے مداحوں کے لیے خوشخبری یہ ہے کہ اس ٹی وی سیریل کے سیزن 2 کی شوٹنگ شروع ہوگئی ہے اور ناظرین جلد ہی اس سیریل کے من پسند کرداروں کو ایک مرتبہ پھر ٹی وی اسکرین پر جلوہ گر دیکھ سکیں گے۔
آئی ڈریم انٹرٹینمنٹ کی پیش کردہ ’بے بی باجی‘ کو ملنے والی پذیرائی کے پیش نظر ڈرامے کی ٹیم نے اس کے اختتام پر ہی عندیہ دیا تھا کہ شاید اس سیریل کا دوسرا ایڈیشن بھی آئے گا اور اس کی تصدیق اداکارہ جویریہ سعود نے بے بی باجی سیزن 2 کے سیٹ سے مختصر ویڈیو شیئر کرتے ہوئے کردی ہے۔
ڈرامہ ’بے بی باجی‘ کی کاسٹ میں ثمینہ احمد، سعود قاسمی، جویریہ سعود، حسن احمد، سنیتا مارشل، جنید نیازی، طوبہ انور، فضل حسین اور آئنہ آصف جیسے اداکار شامل ہیں، ڈرامہ اگست 2023 میں ختم ہوا تھا جس کی ٹیم نے سیزن 1 کے فوراً بعد ڈرامہ کے سیزن 2 کا اشارہ دیا تھا۔
اس ڈرامے کی کہانی ایک خاتون ’بے بی باجی‘ کے کردار کے گرد گھومتی ہے جو اپنی فیملی کو برقرار رکھنا چاہتی تھی، جویریہ سعود کی جانب سے شیئر کی گئی اس ویڈیو سے ’بے بی باجی‘ کے مداح بہت پرجوش ہیں اور عذرا اور دیگر کرداروں کو ایک مرتبہ پھر دیکھنے کے منتظر ہیں۔
اداکارہ جویریہ سعود کی جانب سے ’بے بی باجی‘ کے سیزن 2 کے سیٹ سے شیئر کی گئی مختصر ویڈیو میں سعود قاسمی، جویریہ سعود، جنید نیازی، فضل حسین، سیدہ طوبیٰ اور حسن احمد کو دیکھا جا سکتا ہے، جی ہاں، اس کا مطلب یہ ہے کہ اس ڈرامے کے سیزن 2 کی شوٹنگ شروع کر دی گئی ہے۔
